9 कंपन्यांच्या बाजार भांडवल मूल्यात 3 लाख कोटीची वाढ

भारती एअरटेल आघाडीवर : आयटीसीचे मूल्य घटले

वृत्तसंस्था/ नवी दिल्ली

दहा पैकी नऊ कंपन्यांचे बाजार भांडवल मूल्य मागच्या आठवड्यामध्ये तीन लाख कोटी रुपयांनी वाढल्याचे दिसून आले आहे. यामध्ये आयसीआयसीआय बँक आणि भारती एअरटेल या कंपन्यांचे बाजार भांडवल मूल्य सर्वाधिक वाढले होते.

सेन्सेक्सची दमदार तेजी

शुक्रवारी संपलेल्या आठवड्यामध्ये शेअर बाजारातील दहा पैकी नऊ कंपन्यांचे बाजार भांडवल मूल्य एकंदर 3 लाख 6 हजार 243 कोटी रुपयांनी वाढले होते. मागच्या आठवड्यात बीएसई सेन्सेक्स निर्देशांक 3076 अंकांनी म्हणजेच 4.16 टक्के इतका वाढला होता. दुसरीकडे राष्ट्रीय शेअर बाजाराचा 50 समभागाचा निफ्टी निर्देशांक 953 अंकांनी म्हणजेच 4.25 टक्के वाढला होता.

आयसीआयसीआय, एचडीएफसीची कमाल

बाजार भांडवलाच्याबाबतीत पाहता आयसीआयसीआय बँकेचे बाजार भांडवल मूल्य 64,426 कोटी रुपयांनी वाढत 9,47,628 कोटी रुपयांवर पोहोचले होते. या सोबतच दूरसंचार क्षेत्रातील कंपनी भारती एअरटेलचे मूल्य 53 हजार 286 कोटी रुपयांनी वाढत 9 लाख 84 हजार 354 कोटी रुपयांवर पोहोचले होते. खासगी क्षेत्रातील बँक एचडीएफसी बँकेचे बाजार भांडवल 49 हजार 105 कोटी रुपयांनी वाढत 13 लाख 54 हजार 275 कोटी रुपयांवर पोहोचले. बाजार भांडवल मूल्याच्या बाबतीत आघाडीवर असणाऱ्या रिलायन्स इंडस्ट्रीजचे बाजार भांडवल मूल्य सुद्धा मागच्या आठवड्यात 39 हजार 311 कोटी रुपयांनी वाढत 17 लाख 27 हजार 339 कोटींवर पोहोचले.

टीसीएस, बजाज फायनान्सची कामगिरी

बिगर बँकिंग क्षेत्रातील बजाज फायनान्स या कंपनीचे बाजार भांडवल मूल्य 30953 कोटी रुपयांनी वाढत 5 लाख 52 हजार 846 कोटी रुपयांवर स्थिरावले. आयटी क्षेत्रातील कंपनी टीसीएस चे बाजार भांडवल मूल्य 24,259 कोटींनी वाढत  12 लाख 95 हजार 58 कोटी तर स्टेट बँकेचे बाजार भांडवल मूल्य 22534 कोटी रुपयांनी वाढत 6 लाख 72 हजार 23 कोटी रुपयांवर राहिले होते. हिंदुस्थान युनिलिव्हरचे बाजार भांडवल मूल्य 16823 कोटी रुपयांनी वाढत 5 लाख 28 हजार 58 कोटी रुपयांवर राहिले. दुसरीकडे आयटीसीचे बाजार भांडवल मूल्य मात्र 7570 कोटी रुपयांनी कमी होत 5 लाख 7 हजार 796 कोटी रुपयांवर घसरले होते.