8 कंपन्यांच्या बाजार भांडवल मूल्यात 88 हजार कोटीची वाढ

एचडीएफसी बँकेचे मूल्य सर्वाधिक वाढले

वृत्तसंस्था/ मुंबई

आघाडीवरच्या दहापैकी आठ कंपन्यांचे बाजार भांडवल मूल्य मागच्या आठवड्यात 88 हजार कोटी रुपयांनी वाढले होते. यामध्ये एचडीएफसी बँकेचे बाजार भांडवल मूल्य सर्वाधिक वाढलेले दिसून आले.  शुक्रवारी संपलेल्या आठवड्यात दहापैकी आठ कंपन्यांचे बाजार भांडवल मूल्य 88 ,085.89 कोटी रुपयांनी वाढलेले दिसून आले. एचडीएफसी बँक पाठोपाठ टीसीएस, भारती एअरटेल, आयसीआयसीआय बँक, एसबीआय, बजाज फायनान्स, हिंदुस्थान युनिलिव्हर आणि आयटीसी यांच्या बाजार मूल्यातही वाढ झाली आहे. दुसरीकडे दिग्गज कंपनी रिलायन्स इंडस्ट्रीज आणि आयटी क्षेत्रातील कंपनी इन्फोसिस यांचे बाजार भांडवलमूल्य मात्र घसरणीत पाहायला मिळाले.

 एचडीएफसी, आयटीसी, टीसीएसचे मूल्य वाढले

एचडीएफसी बँकेचे बाजार भांडवलमूल्य 44 हजार 933 कोटी रुपयांनी वाढत 13 लाख 99 हजार 208 कोटी रुपये, एसबीआयचे बाजारमूल्य 16599 कोटी रुपये वाढत 6 लाख 88 हजार 623 कोटी रुपये तर आयटी क्षेत्रातील कंपनी टीसीएसचे बाजार भांडवल मूल्य 9003 कोटींनी वाढत 13 लाख 4 हजार 121 कोटी रुपयांवर पोहोचले होते. आयसीआयसीआय बँकेचे बाजारमूल्य 5140 कोटी रुपयांनी वाढत 9 लाख 52 हजार 768 कोटी रुपयांवर स्थिरावले होते. याच दरम्यान आयटीसीचे बाजार भांडवल मूल्य 5,032 कोटी रुपयांनी वाढत 5 लाख 12 हजार 828 कोटी रुपयांवर आणि एचयुएलचे बाजारमूल्य 2796 कोटींनी वाढत 5 लाख 30 हजार 854 कोटी रुपयांवर पोहोचले होते. भारती एअरटेलचे बाजारमूल्य 2651 कोटींनी वाढत 9लाख 87 हजार 5कोटी रुपये आणि बजाज फायनान्सचे बाजारमूल्य 1868 कोटींनी वाढत 5 लाख 54 हजार 715 कोटी रुपयांवर पोहोचले.

यांचे बाजारमूल्य घसरणीत

घसरणीमध्ये पाहता रिलायन्स इंडस्ट्रीजचे बाजार भांडवल मूल्य 1962 कोटींनी कमी होत 17 लाख 25 हजार 377 कोटी रुपयांवर घसरले. इन्फोसिसचे बाजार भांडवल मूल्य सुद्धा 9135 कोटी रुपयांनी कमी होत 6 लाख 52 हजार 228 कोटी रुपयांवर खाली

आले.