मध्यप्रदेशची निकिता पोरवाल ‘मिस इंडिया-2024’

मिस वर्ल्डमध्ये भारताचे प्रतिनिधित्व करणार

वृत्तसंस्था/उज्जैन

मध्यप्रदेशातील उज्जैन येथील रहिवासी असलेल्या निकिता पोरवाल या सौंदर्यवतीने फेमिना मिस इंडिया-2024 चा किताब जिंकला. निकिता आता मिस वर्ल्ड स्पर्धेत भारताचे प्रतिनिधित्व करणार आहे. ‘मिस इंडिया 2024’चा ग्रँड फिनाले मुंबईतील वरळी येथे पार पडला. निकिताने विजेतेपद पटकावल्यानंतर तिच्या उज्जैन येथील निवासस्थानी तिचे अभिनंदन करण्यासाठी लोकांनी गर्दी केली होती. उज्जैन येथील पोरवाल यांच्या घरी आनंदाचे वातावरण आहे.

सुमारे दोन महिन्यांपूर्वी निकिताने 200 स्पर्धकांना पराभूत करत ‘फेमिना मिस इंडिया मध्यप्रदेश 2024’चा किताब जिंकला होता. ही तिची पहिली सौंदर्य स्पर्धा होती. पहिल्याच प्रयत्नात ती या स्पर्धेत यशस्वी झाली होती. निकिताला अभिनयासोबतच लेखनाचीही आवड आहे. तिने अनेक राष्ट्रीय आणि आंतरराष्ट्रीय रंगमंचाच्या पटकथा लिहिल्या असून त्यात 250 पानांच्या ‘कृष्ण लीला’चा समावेश आहे.