राकसकोप मार्गावर जादा बस सोडा

बेनकनहळ्ळी ग्रा. पं. तर्फे परिवहनकडे मागणी

बेळगाव : बेनकनहळ्ळी, सावगाव, गणेशपूर, सोनोली, बडस मार्गावर बसेसची कमतरता असल्याने प्रवाशांची मोठी गैरसोय होऊ लागली आहे. विशेषत: विद्यार्थी वर्गाची हेळसांड होत आहे. तातडीने या मार्गावर जादा बसेसची व्यवस्था करावी, अशा मागणीचे निवेदन बेनकनहळ्ळी ग्रा. पं. सदस्यांतर्फे डेपो मॅनेजर अनंत शिरगुप्पीकर यांच्याकडे सुपूर्द करण्यात आले. वरील भागातून दररोज बेळगावला शालेय आणि महाविद्यालयीन शिक्षणासाठी येणाऱ्या विद्यार्थ्यांची संख्या मोठी आहे. मात्र या मार्गावर बसेसचा तुटवडा असल्याने विद्यार्थ्यांचे शैक्षणिक नुकसान होऊ लागले आहे. सध्या अर्धवार्षिक परीक्षा सुरू आहेत. मात्र वेळेत बसेस नसल्याने विद्यार्थ्यांना परीक्षा देताना अडचणी निर्माण होत आहेत. अनियमित आणि अपुऱ्या बस सेवेमुळे विद्यार्थ्यांचे हाल होत आहेत. या मार्गावर अतिरिक्त बसफेऱ्या सोडून विद्यार्थ्यांची गैरसोय दूर करावी, अशी मागणीही निवेदनाद्वारे करण्यात आली आहे. यावेळी ग्रा. पं. सदस्य कल्लाप्पा पाटील, संगीता बाणेकर, गणेश सुतार, सदस्य व ग्रामस्थ उपस्थित होते.