लक्ष्य सेन, सात्विक-चिराग उपउपांत्यपूर्व फेरीत

वृत्तसंस्था/ओडेन्स, डेन्मार्क

येथे सुरू झालेल्या डेन्मार्क ओपन 2025 बॅडमिंटन स्पर्धेत भारताचे लक्ष्य सेन व सात्विकसाईराज-चिराग शेट्टी यांनी उपउपांत्यपूर्व फेरीत स्थान मिळविले. जीस्के बँक एरेना येथे खेळविण्यात येत असलेल्या या स्पर्धेत जागतिक क्रमवारीत 21 व्या स्थानावर असणाऱ्या लक्ष्य सेनने आयर्लंडच्या 28 व्या मानांकित एन्हात एन्ग्युएनचा 10-21, 21-8, 21-18 असा पराभव केला. सव्वातास ही लढत रंगली होती. लक्ष्यने या सामन्यात अडखळत सुरुवात केली आणि फारसा प्रतिकार न करता पहिला गेम दिला. मात्र दुसऱ्या गेममध्ये त्याने दमदार खेळ करीत बाजू पलटवली आणि केवळ 8 गुण गमवित हा गेम जिंकून बरोबरी साधली. निर्णायक गेममध्ये दोघांचाही तोडीस तोड खेळ झाला. अखेरीस लक्ष्यने संयम राखत हा गेम जिंकून आयरिश खेळाडूचे आव्हान संपुष्टात आणले. एन्ग्युएनविरुद्ध मिळविलेला जिंकलेला चारपैकी तिसरा सामना होता.

पुरुष दुहेरीत सहावे मानांकन मिळालेल्या सात्विकसाईराज व चिराग शेट्टी यांनी जागतिक 41 व्या मानांकित स्कॉटलंडच्या ख्रिस्तोफर ग्रिमले व मॅथ्यू ग्रिमले यांच्यावर 17-21, 21-11, 21-17 अशी मात करीत आगेकूच केली. एक तास चार मिनिटे हा सामना रंगला होता. सात्विक-चिराग यांना गेल्या महिन्यांत दोन स्पर्धांमध्ये उपविजेतेपद मिळाले होते. हाँगकाँग ओपन व चायना मास्टर्स स्पर्धेत त्यांनी अंतिम फेरी गाठली होती. यावेळी या सुपर 750 स्पर्धेचे जेतेपद पटकावत ही मालिका खंडित करण्याचा त्यांचा प्रयत्न असेल. दरम्यान, मोहित जगलन व लक्षिता जगलन यांना मिश्र दुहेरीत पराभवाला सामोरे जावे लागले. इंडोनेशियाच्या अदनान मौलाना व इंदाह काह्या सारी जमिल यांच्याकडून त्यांना 14-21, 11-21 असा पराभव स्वीकारावा लागला.