लक्ष्य सेन उपांत्यपूर्व फेरीत

वृत्तसंस्था/कुमामोटो (जपान)

विश्व बॅडमिंटन फेडरेशनच्या येथे सुरू असलेल्या कुमामोटो जपान मास्टर्स आंतरराष्ट्रीय बॅडमिंटन स्पर्धेत भारताचा लक्ष्य सेनने पुरूष एकेरीची उपांत्यपूर्व फेरी गाठली आहे. मात्र एच. एस. प्रणॉयचे आव्हान संपुष्टात आले आहे. गुरूवारी खेळविण्यात आलेल्या पुरूष एकेरीच्या सामन्यात सातव्या मानांकीत लक्ष्य सेनने सिंगापूरच्या जीया हेंग जेसन के याचा 39 मिनिटांच्या कालावधीत 21-13, 21-11 अशा सरळ गेम्समध्ये पराभव करत शेवटच्या 8 खेळाडूंत स्थान मिळविले. आता जागतिक बॅडमिंटनपटूच्या मानांकनात 15 व्या स्थानावर असलेला लक्ष्य सेनचा उपांत्यपूर्व फेरीचा सामना सिंगापूरच्या माजी विश्वविजेत्या लोह कीन येवशी होणार आहे. लक्ष्य सेनने 2021 च्या विश्व बॅडमिंटन चॅम्पियनशिप स्पर्धेत कांस्यपदक मिळविले होते.