कोल्हापूर परिक्षेत्रीय पोलीस क्रीडा आजपासून
कोल्हापूरसह सांगली, सातारा, सोलापूर शहर, ग्रामीण आणि पुणे ग्रामीणमधील 1200 खेळाडूचा सहभाग
कोल्हापूर :
शहरातील कसबा बावडा येथील पोलीस मुख्यालयाच्या परेड मैदानावर सुवर्ण महोत्सवी कोल्हापूर परिक्षेत्रातील पोलीस क्रीडा स्पर्धेला आजपासून (दि. 29) सुरुवात होत आहे. या स्पर्धेत कोल्हापूरसह सोलापूर शहर, सोलापूर ग्रामीण, पुणे ग्रामीण, सांगली, सातारा या सहा जिह्यातील 1 हजार 200 पुरुष व महिला खेळाडू सहभागी होणार आहेत. पोलीस अधीक्षक महेंद्र पंडित यांच्या हस्ते या स्पर्धेचा शुक्रवारी दुपारी पाच वाजता शुभारंभ होणार आहे. दरम्यान या स्पर्धेचा समारोप 4 डिसेंबर रोजी होईल.
राज्याच्या पोलीस दलातील अधिकारी व पोलीस अंमलदार यांच्यावरील कामाचा वाढता ताण, बंदोबस्त यामुळे त्यांच्या आरोग्यावर विपरित परिणाम होत असतो. त्यामुळे पोलीस दलावरील ताण कमी व्हावा व पोलिसांना विरंगुळा मिळावा, पोलिसांना आपले क्रीडा कौशल्य व शारिरीक क्षमता दाखवता यावी. तसेच पोलीस दलामध्ये सांघिक भावना व खिलाडूवृत्ती विकसित व्हावी, यासाठी प्रत्येक वर्षी परिक्षेत्रीय पोलीस क्रीडा स्पर्धेचे आयोजन केले जाते. या स्पर्धेमध्ये अॅथलेटिक्स, फुटबॉल, हॅन्डबॉल, हॉकी, व्हॉलिबॉल, बास्केटबॉल, जलतरण, कुस्ती, ज्युदो, बॉक्सींग, वेटलिफ्टींग, कबड्डी, खो-खो, वुशु, तायक्वांदो, पॉवरलिफ्टींग, क्रॉसकंट्री, बॉडीबिल्डींग आदी वैयक्तिक आणि सांघिक खेळांचा समावेश आहे. या स्पर्धेमध्ये चांगली कामगिरी करणाऱ्या खेळाडूंची निवड कोल्हापूर परिक्षेत्र क्रीडा संघात होत असलेने सर्व खेळाडू आपले कौशल्य पणाला लावून आपली कामगिरी उंचावण्याचा प्रयत्न करीत असतात.
राज्य पोलीस क्रीडा ठाणे येथे
महाराष्ट्र राज्य पोलीस क्रीडा स्पर्धा यंदा ठाणे येथे होणार आहेत. या स्पर्धेसाठी कोल्हापूर परिक्षेत्राच्या संघाची निवड ही कोल्हापूरात होत असलेल्या कोल्हापूर परिक्षेत्रीय क्रीडा स्पर्धेतून करण्यात येणार आहे.
स्पर्धेचा 4 डिसेंबरला बक्षीस वितरण
कोल्हापूर परिक्षेत्रीय क्रीडा स्पर्धेचा 4 डिसेंबर रोजी समारोप होणार असून, याच दिवशी सायंकाळी पुणे विभागाचे आयुक्त डॉ. चंद्रकांत पुलकुंडवार यांच्या हस्ते या स्पर्धेचा बक्षीस वितरण समारंभ पार पडणार आहे.
स्पर्धेचे बोधचिन्ह ‘गवा’
कोल्हापूर परिक्षेत्रातील पोलीस क्रीडा स्पर्धेदरम्यान 2 डिसेंबर रोजी सकाळी पत्रकार व पोलीस अधिकारी यांच्यात मैत्रीपूर्ण क्रिकेटचा सामना आयोजित करण्यात आला आहे. या स्पर्धेचे बोधचिन्ह जिह्यात आढळून येणारा ‘गवा’ ठेवण्यात आले आहे. या स्पर्धेतील सामने पोलीस मुख्यालय परेड मैदान, छत्रपती शिवाजी विद्यापीठ, शहाजी लॉ कॉलेज, राजर्षि छत्रपती शाहू कॉलेज या ठिकाणी खेळविण्यात येणार आहेत.
यंदा कोल्हापूरला मान
सुवर्ण महोत्सवी कोल्हापूर परिक्षेत्रातील पोलीस क्रीडा आयोजित करण्याचा मान यंदा कोल्हापूर परिक्षेत्राचे विशेष पोलीस महानिरीक्षक सुनिल फुलारी यांनी कोल्हापूर जिल्हा पोलीस दलाला दिला आहे. त्यामुळे या स्पर्धेच्या मैदानाची तयारी जिल्हा पोलीस दलाकडून मोठ्या जोमाने केली जात आहे.