कर्नाटकाला 144 धावांची बढत

वृत्तसंस्था/ पाटणा

2024 च्या रणजी क्रिकेट हंगामातील क गटात येथे सुरू असलेल्या सामन्यात सोमवारी खेळाच्या तिसऱ्या दिवशी कर्नाटकाने बिहारवर 144 धावांची आघाडी मिळविली.

या सामन्यात बिहाराचा पहिला डाव 143 धावांत आटोपल्यानंतर कर्नाटकाने पहिल्या डावात 51 षटकात 7 बाद 287 धावा जमविल्या. कर्नाटक संघातील कर्णधार मयांक अगरवालने शानदार शतक (105) तर मनीष पांडेने अर्धशतक (56) झळकविले. सुजय सातेरीने 1 चौकारासह 10, जोसने 2 चौकारांसह 16 आणि सीमरनने 4 चौकारांसह 37 त्याच प्रमाणे अभिनव मनोहरने 1 षटकार आणि 6 चौकारांसह 37 धावा जमविल्या. मनीष पांडेने 55 चेंडूत 2 षटकार आणि 5 चौकारांसह 56 तर कर्णधार अगरवालने 131 चेंडूत 12 चौकारांसह 105 धावा झोडपल्या. बिहारतर्फे हिमांशु सिंगने 51 धावांत 4 तर शकीब हुसेनने 86 धावांत 2 गडी बाद केले.

संक्षिप्त धावफलक: बिहार प. डाव सर्वबाद 143, कर्नाटक प. डाव 51 षटकात 7 बाद 287 (मयांक अगरवाल 105, मनीष पांडे 56, सिमरन 37, अभिनव मनोहर 37, हिमांसु सिंग 4-51)