कंग्राळी खुर्दचे मल्ल कनकपूरला रवाना

वार्ताहर /कंग्राळी बुद्रुक 

कंग्राळी खुर्द गावातील कुस्तीपटूंनी सार्वजनिक शिक्षण खात्याच्यावतीने घेण्यात आलेल्या शालेय जिल्हास्तरीय कुस्ती स्पर्धेत घवघवीत यश संपादन केल्यानंतर या सर्वांची राज्यस्तरीय स्पर्धेसाठी निवड झाली होती. आज हे सर्व कुस्तीपटू राज्यस्तरीय कुस्ती स्पर्धेसाठी बेंगळूर येथील कनकपूर येथे वस्ताद भाऊ पाटील, नारायण पाटील, प्रल्हाद पाटील यांच्या समवेत रवाना झाले. या सर्व कुस्तीपटूंना गावातील कुस्तीप्रेमी नागरिकांच्यावतीने सत्कार करून पुढील यशाच्या शुभेच्छा देण्यात आल्या.

या गावचे कुस्तीपटू श्रेयस मनोहर पाटील, प्रथमेश दीपक पावशे, ध्रुव खजगोनट्टी तसेच महिला कुस्तीपटू गौतमी नारायण पाटील, सिद्धी प्रशांत निलजकर यांनी वेगवेगळ्या वजनी गटात प्रथम क्रमांक मिळवून कंग्राळी खुर्द गावच्या शिरपेचात मानाचा तुरा रोवण्याचे काम केले आहे. आज या सर्व कुस्तीपटूंना श्री बाल हनुमान तालीम मंडळ व कुस्तीप्रेमी नागरिक व ग्रामस्थांच्यावतीने त्यांचा सत्कार करून पुढील यशासाठी शुभेच्छा दिल्या. सदर स्पर्धा कनकपूर येथे 24 ऑक्टोबर पासून 27 पर्यंत होणार आहेत. यावेळी ग्रा. पं. सदस्य प्रशांत पाटील, तालीम कार्यकारी मंडळाचे सदस्य मनोहर पाटील, किरण (पिंटू) पाटील, जोतिबा पाटील, दिपक पावशे, विनय पाटीलसह ग्रामस्थ उपस्थित होते.