के. आर. शेट्टी लायाज, प्रमोद पालेकर संघांची विजयी सलामी

बेळगाव : प्रमोद पालेकर क्रिकेट अकादमी आयोजित एस. बी. अलाबाल चषक 10 वर्षांखालील क्रिकेट स्पर्धेत उद्घाटन दिवशी के. आर. शेट्टी लायाज संघाने जिमखाना संघाचा 23 धावांनी, प्रमोद पालेकर अकादमीने रॉजर क्रिकेट क्लबचा 9 गड्यांनी पराभव करून विजयी सलामी दिली. सामनावीर संग्राम पाटील, के. आर. शेट्टी, शानू धोंड यांना सामनावीर पुरस्कार देण्यात आला. व्हॅक्सिन डेपो मैदानावरती स्पर्धेच्या उद्घाटनप्रसंगी प्रमुख पाहुणे म्हणून माजी उपमहापौर आनंद चव्हाण, मुर्गेश अलाबाल, भारती अलाबाल, महानंदा अलाबाल, मिलिंद चव्हाण, प्रमोद पालेकर आदी मान्यवरांच्या हस्ते यष्टीचे पूजन करून स्पर्धेचे उद्घाटन करण्यात आले.

पहिल्या सामन्यात के. आर. शेट्टी लायाज संघाने प्रथम फलंदाजी करताना 10 षटकात 3 गडी बाद 139 धावा केल्या. त्यात संग्राम पाटीलने 11 चौकारासह 59 चेंडूत 72, अद्विन मुरकुटे 3 चौकारांसह 28 धावा केल्या. जिमखानातर्फे निखील जाधवने 2 गडी व आरूषने 1 गडी बाद केला. प्रत्युत्तरादाखल खेळताना जिमखानाने 20 षटकात 5 गडी बाद 116 धावाच केल्या. त्यात अथर्व हर्जेने 3 चौकारांसह 19, प्रणव वेर्णेकरने 2 चौकारांसह 15 धावा केल्या. दुसऱ्या सामन्यात रॉजर क्रिकेट क्लबने प्रथम फलंदाजी करताना 20 षटकात 6 गडी बाद 102 धावा केल्या. त्यात साई पाटीलने 5 चौकारांसह 49 धावा केल्या. प्रमोद पालेकरतर्फे अहिल धामणेकरने 1 गडी बाद केला. प्रत्युत्तरादाखल खेळताना प्रमोद पालेकर संघाने 15.5 षटकात 1 गडी बाद 103 धावा करून सामना 9 गड्यांनी जिंकला. त्यात प्रथम अलाबालने 6 चौकारांसह 36, शानू धोंडने 2 चौकारांसह 18 धावा केल्या.