जिओ ब्लॅकरॉक चार नवीन इंडेक्स फंड करणार लाँच

मुंबई :

जिओ ब्लॅकरॉक म्युच्युअल फंडला सिक्युरिटीज अँड एक्सचेंज बोर्ड ऑफ इंडिया (सेबी) यांच्याकडून चार नवीन गुंतवणूक योजना सुरू करण्यास मान्यता मिळाली आहे. कंपनीने बुधवारी सेबी वेबसाइटवर प्रसिद्ध केलेल्या नियामक फाइलिंगमध्ये ही माहिती दिली आहे.

या योजनांमध्ये जिओ ब्लॅकरॉक निफ्टी मिडकॅप 150 इंडेक्स फंडचा समावेश आहे. या योजनेअंतर्गत, ओपन-एंडेड फंड निफ्टी मिडकॅप 150 इंडेक्सचा मागोवा घेणाऱ्या मिडकॅप कंपन्यांमध्ये गुंतवणूक करण्यात येईल. यामुळे मिडकॅप सेगमेंटमध्ये वेगळ्या पद्धतीने गुंतवणूक करण्याचा पर्याय उपलब्ध होणार आहे. दुसऱ्या फंडाचे नाव जिओ ब्लॅकरॉक निफ्टी नेक्स्ट 50 इंडेक्स फंड आहे. हा फंड निफ्टी नेक्स्ट 50 इंडेक्सवर लक्ष केंद्रित करेल.

त्यात बाजारमूल्याच्या आधारे 51 ते 100 क्रमांकाच्या कंपन्यांचा समावेश आहे. यामुळे गुंतवणूकदारांना भविष्यात लार्जकॅपमध्ये समाविष्ट होऊ शकणाऱ्या कंपन्यांमध्ये सहभागी होण्याची संधी मिळेल. याशिवाय जिओ ब्लॅकरॉक निफ्टी स्मॉलकॅप 250 इंडेक्स फंड आहे. या अंतर्गत हा फंड निफ्टी स्मॉलकॅप 250 इंडेक्सचा भाग असलेल्या स्मॉल कॅप कंपन्यांमध्ये गुंतवणूक करेल. ही योजना उच्च जोखीम घेणाऱ्या गुंतवणूकदारांसाठी आहे, ज्यांना दीर्घकालीन भांडवल वाढ हवी आहे.

चौथी योजना जिओब्लॅकरॉक निफ्टी 8 ते 13 वर्षांचा जी-सेक इंडेक्स फंड आहे. या योजनेद्वारे ते दीर्घकालीन सरकारी सिक्युरिटीज (गिल्ट्स) ट्रॅक करेल. त्यांची परिपक्वता 8 ते 13 वर्षांच्या दरम्यान आहे. ही योजना कमी क्रेडिट जोखीम आणि उच्च व्याजदर संवेदनशीलता हवी असलेल्या निश्चित उत्पन्न गुंतवणूकदारांसाठी आहे.

या सर्व योजना इंडेक्स फंड म्हणून डिझाइन केल्या आहेत. त्या फक्त डायरेक्ट प्लॅन आणि ग्रोथ पर्यायात उपलब्ध असतील. या योजनांमध्ये कोणताही एक्झिट लोड नसेल आणि किमान गुंतवणूक रक्कम 500 रुपये असेल. सर्व योजना सेबीच्या मार्गदर्शक तत्त्वांनुसार मालमत्ता वाटपाचे पालन करतील. प्रत्येक फंडाचे सबक्रिप्शन 3 ते 15 दिवसांच्या नवीन फंड ऑफर (एनएफओ) दरम्यान खुले राहणार आहेत.