जसप्रीत बुमराह सर्वोत्तम कसोटीपटू

 आयसीसीचा हा पुरस्कार जिंकणारा पहिला भारतीय वेगवान गोलंदाज : स्मृती मानधना ठरली सर्वोत्कृष्ट वनडे क्रिकेटपटू

वृत्तसंस्था/ दुबई

टीम इंडियाचा दिग्गज वेगवान गोलंदाज जसप्रीत बुमराह व महिला संघाची सलामीवीर व स्टार खेळाडू स्मृती मानधना यांना आयसीसीचा सर्वोत्कृष्ट कसोटीपटू व वनडेपटू 2024 पुरस्कार जाहीर झाला आहे. विशेष म्हणजे, हा किताब मिळवणारा बुमराह हा भारताचा पहिला वेगवान गोलंदाज आहे. तसेच ‘महिला वनडे क्रिकेटपटू ऑफ द इयर’ पुरस्कार दोनदा जिंकणारी स्मृती जगातील दुसरी खेळाडू ठरली. याआधी तिला 2018 मध्ये या पुरस्काराने गौरवण्यात आले होते.

जसप्रीत बुमराह 2024 चा आयसीसीचा सर्वोत्कृष्ट कसोटी क्रिकेटपटू ठरला आहे. या पुरस्काराच्या शर्यतीत बुमराहने इंग्लंडच्या हॅरी ब्रुक आणि जो रूट आणि श्रीलंकेचा युवा फिरकीपटू कामिंदू मेंडिस यांना मागे टाकताना पुरस्काराला गवसणी घातली आहे. अर्थात, आयसीसीचा हा मानाचा पुरस्कार जिंकणारा तो भारताचा सहावा खेळाडू तर पहिलाच वेगवान गोलंदाज ठरला आहे. बुमराहच्या आधी राहुल द्रविड (2004), गौतम गंभीर (2009), वीरेंद्र सेहवाग (2010), रविचंद्रन अश्विन (2016) आणि विराट कोहली (2018) यांनी हा पुरस्कार पटकावला होता.

2024 मध्ये बुमराहचा धमाका

टीम इंडियासाठी मागील काही वर्षात गेमचेंजर ठरलेल्या बुमराहची गतवर्षी कामगिरी धमाकेदार राहिली. मायदेशातील इंग्लंड व बांगलादेशविरुद्ध मालिकेत संघाला विजय मिळवून देण्यात मोलाचा वाटा उचलला. याशिवाय, दक्षिण आफ्रिका, ऑस्ट्रेलिया दौऱ्यातही त्याची कामगिरी उल्लेखनीय राहिली. बॉर्डर-गावसकर ट्रॉफीतही त्याने शानदार गोलंदाजी करताना मालिकावीर पुरस्कार जिंकला. बुमराहने 2024 मध्ये 13 कसोटी सामन्यांमध्ये सर्वाधिक 71 विकेट घेत सर्वच गोलंदाजांना मागे टाकले.  गेल्या वर्षी कसोटी क्रिकेटमध्ये सर्वाधिक विकेट घेणाऱ्या बुमराहशिवाय इतर कोणत्याही गोलंदाजाला 60 विकेट्सचा आकडाही गाठता आला नाही.

सांगलीच्या स्मृती मानधनाचा आयसीसीकडून गौरव

2024 मधील वनडे क्रिकेटमधील उत्कृष्ट कामगिरीसाठी भारतीय महिला संघाची स्टार फलंदाज स्मृती मानधनाला आयसीसीने सर्वोत्कृष्ट वनडे महिला क्रिकेटपटूचा पुरस्कार दिला आहे. स्मृती मानधनाने या शर्यतीत दक्षिण आफ्रिकेची लोरा वोल्वार्ड, श्रीलंकेची चमारी अट्टापटू, ऑस्ट्रेलियाची एनाबेल सदरलँड यांना मागे टाकत हा पुरस्कार पटकावला. हा पुरस्कार जिंकून स्मृतीने जागतिक रेकॉर्डची बरोबरी केली आहे. ‘महिला वनडे क्रिकेटपटू ऑफ द इयर‘ पुरस्कार दोनदा जिंकणारी ती जगातील दुसरी खेळाडू ठरली. तिच्याशिवाय न्यूझीलंडची दिग्गज खेळाडू सुझी बेट्सने हा पुरस्कार दोनदा जिंकला आहे. 2018 मध्ये मानधनाने तिचा पहिला ‘आयसीसी महिला वनडे क्रिकेटर ऑफ द इयर‘ पुरस्कार जिंकला. बेट्सने 2013 आणि 2016 मध्ये हा पुरस्कार जिंकला होता.

स्मृतीने 2024 मध्ये 13 एकदिवसीय सामन्यांमध्ये 57.46 च्या सरासरीने 747 धावा केल्या. यादरम्यान तिने 4 शतके आणि 3 अर्धशतके झळकावली. 2024 हे वर्ष स्मृतीसाठी अप्रतिम असे राहिले. द.आफ्रिका, ऑस्ट्रेलिया, न्यूझीलंड, वेस्ट इंडिजविरुद्ध खेळताना तिने टीम इंडियाच्या विजयात मोलाचे योगदान दिले. वनडे क्रिकेटमधील या अनमोल योगदानासाठी तिला सर्वोत्तम वनडे क्रिकेटपटू या पुरस्काराने गौरवण्यात येणार आहे.

मला नेहमीच कसोटी क्रिकेट खेळायचे होते. गत वर्ष माझ्यासाठी खूप खास होते. मी खूप काही शिकलो आणि संघासाठी सामनेही जिंकले. विशाखापट्टणम कसोटीतील ओली पोपची विकेट माझ्यासाठी सर्वात खास होती. कारण त्या विकेटनंतर सामन्याचा रोख बदलला. हा पुरस्कार जिंकल्याचा खूप आनंद आहे.

जसप्रीत बुमराहृ टीम इंडियाचा दिग्गज गोलंदाज