जपानचा बॅडमिंटनपटू मोमोटा निवृत्त
वृत्तसंस्था /नवी दिल्ली
जपानचा आंतरराष्ट्रीय बॅडमिंटनपटू तसेच दोनवेळा विश्वविजेतेपद मिळविणारा केंटो मोमोटाने आंतरराष्ट्रीय बॅडमिंटन क्षेत्रातून निवृत्तीची घोषणा केली. काही मानसिक आणि शारीरिक तंदुरुस्तीच्या समस्येमुळे मोमोटाने 29 व्या वर्षी बॅडमिंटन क्षेत्राला निरोप दिला आहे. 2020 साली झालेल्या वाहन दुर्घटनेमध्ये मोमोटाला गंभीर दुखापत झाली होती. या दुखापतीमुळे त्याच्या बॅडमिंटन कामगिरीवरही विपरीत परिणाम झाला होता. 2019 चे बॅडमिंटन वर्ष हे मोमोटाला सर्वात यशस्वी ठरले होते. त्याने या कालावधीत 11 स्पर्धा जिंकल्या होत्या. वाहन दुर्घटनेमध्ये त्याच्या डाव्या डोळ्याला गंभीर दुखापत झाली होती. या दुखापतीनंतर मोमोटाच्या कामगिरीवर विपरीत परिणाम झाल्याने त्याने या क्षेत्रापासून अलिप्त होण्याचा निर्णय थोडा उशिरा घेतला. चीनमध्ये गेल्यावेळी झालेल्या थॉमस चषक बॅडमिंटन स्पर्धेत त्याने जपानचे प्रतिनिधीत्व केले होते. मोमोटाची ही शेवटची आंतरराष्ट्रीय स्पर्धा ठरली. 2019 च्या कालावधीत मोमोटाने 73 पैकी 67 सामने सातत्याने जिंकले होते. बॅडमिंटनपटूंच्या मानांकनात तो सध्या 52 व्या स्थानावर आहे.