आयफोन दुरुस्तीचे काम टाटाकडे

ट्रम्पच्या धमकीला न जुमानता अॅपलने घेतला  निर्णय

वृत्तसंस्था/ नवी दिल्ली

अमेरिकेचे राष्ट्राध्यक्ष डोनाल्ड ट्रम्प यांनी अॅपलला अमेरिकेसाठी आयफोन भारतात बनवू नये असा इशारा दिला. त्यांनी अशी धमकीही दिली की जर भारतात बनवलेले आयफोन अमेरिकेत विकले गेले तर त्यावर 25 टक्के कर (टॅरिफ) लादला जाईल. परंतु असे असूनही, अॅपलने भारतात आपले कामकाज वेगाने वाढवले आहे.

अॅपलने आता भारतातील आयफोन आणि मॅकबुक दुरुस्तीचे काम टाटा समूहाला आउटसोर्स केले आहे. यावरून हे स्पष्ट होते की अॅपलच्या पुरवठा साखळीत (उत्पादन आणि पुरवठा नेटवर्क) टाटा समूहाची भूमिका लक्षणीयरीत्या वाढत आहे.

भारतात उत्पादनावर भर

एका अहवालानुसार, अॅपल आता चीनऐवजी भारतात उत्पादनावर अधिक लक्ष केंद्रित करत आहे आणि टाटा त्यांची पहिली पसंती बनली आहे. टाटा आधीच दक्षिण भारतातील तीन ठिकाणी आयफोनचे उत्पादन करत आहे. आता ते कर्नाटकातील त्यांच्या प्लांटमधून आयफोन दुरुस्तीचे काम देखील सुरू करेल.

भारत जगात दुसऱ्या स्थानी

भारत हा जगातील दुसऱ्या क्रमांकाचा स्मार्टफोन बाजार आहे आणि येथे आयफोनची विक्री झपाट्याने वाढत आहे. गेल्या वर्षी भारतात सुमारे 1.1 दशलक्ष आयफोन विकले गेले, ज्यामुळे अॅपलचा बाजारातील वाटा 7 टक्के इतका झाला. 2020 मध्ये वाटा नाममात्र फक्त 1 टक्के होता. या वर्षाच्या सुरुवातीला, अॅपलने शाओमीसारख्या चिनी कंपन्यांना मागे टाकले आहे आणि आता ते भारतातील टॉप 5 स्मार्टफोन ब्रँडमध्ये सामील झाले आहेत.