24 तास पाणीपुरवठा योजनेसाठी मंडोळी रोडवर विविध खात्यांची पाहणी

बेळगाव : 24 तास पाणीपुरवठा योजनेसाठी एलअँडटी कडून जलवाहिनी घालण्याचे काम काही ठिकाणी पूर्ण झाले आहे. त्यामुळे घरोघरी नळजोडणी करण्याचे काम हाती घेण्यात आले आहे. प्रभाग क्र. 44 मध्ये येणाऱ्या मंडोळी रोडवर घरोघरी नळजोडणी करण्यासंदर्भात नगरसेवक आनंद चव्हाण यांच्या उपस्थितीत एलअँडटी, स्मार्ट सिटी, सार्वजनिक बांधकाम खाते, मेगा गॅस आणि हेस्कॉमच्यावतीने संयुक्तरित्या पाहणी करण्यात आली. महापालिकेच्या प्रभाग क्र. 44 मध्ये येणाऱ्या मंडोळी रोडवर रहिवाशांना एलअँडटी कडून 24 तास पाण्यासाठीचे कनेक्शन दिले जाणार आहे. मात्र, या कामादरम्यान नागरिकांना याचा त्रास होऊ नये, यासाठी नगरसेवक आनंद चव्हाण यांनी स्वत: अधिकाऱ्यांच्या उपस्थितीत पाहणी करून समस्या जाणून घेतल्या.