भारताचा दक्षिण कोरियावर विजय

वृत्तसंस्था/ चेंगशा (चीन)

बिली जिन किंग चषक सांघिक महिलांच्या टेनिस स्पर्धेतील आशिया ओसेनिया गट 1 मधील लढतीत भारताने दक्षिण कोरियाचा 2-1 अशा फरकाने पराभव केला.

या विजयामुळे भारतीय संघाने अ गटातून दुसरे स्थान मिळवले असून त्यांनी तीन सामने जिंकले असून एक सामना गमवला आहे. भारत आणि द. कोरिया यांच्यातील लढतीत पहिल्या एकेरी सामन्यात भारताच्या ऋतुजा भोसलेने द. कोरियाच्या पार्कचा 6-2, 6-2 असा पराभव केला. त्यानंतर दुसऱ्या एकेरी सामन्यात द. कोरियाच्या जेंगने अंकिता रैनाचा 6-2, 6-3 असा पराभव करत आपल्या संघाला बरोबरी साधून दिली होती. पण शेवटच्या दुहेरीच्या सामन्यात अंकिता रैना आणि प्रार्थना ठोंबरे यांनी कोरियाच्या पार्क आणि किम यांचा 6-4, 6-4 असा फडशा पाडत कोरियाचे आव्हान या लढतीत 2-1 असे संपुष्टात आणले. हा दुहेरीचा सामना दीडतास चालला होता. या स्पर्धेमध्ये भारताने पहिल्या सामन्यात पॅसिफिक ओसेनियाचा 3-0, चीन तैपेईचा 2-1 तर द. कोरियाचा 2-1 असा पराभव केला. मात्र चौथ्या लढतीत चीनने भारतावर 3-0 अशी एकतर्फी मात केली होती.