सलग सुट्यांमुळे प्रवासी संख्येत वाढ

मध्यवर्ती बसस्थानकात गर्दी : लांबपल्ल्यासह स्थानिक बससेवेवर प्रवाशांचा अतिरिक्त ताण

प्रतिनिधी/ बेळगाव

सलग सुट्यांमुळे प्रवासी संख्येत वाढ झाली आहे. शनिवारी सकाळपासूनच मध्यवर्ती बसस्थानकात प्रवाशांची गर्दी वाढली होती. सलग तीन दिवस सुटी असल्यामुळे सरकारी कर्मचारी व इतरांनी बाहेर पडणे पसंत केले. त्यामुळे लांबपल्ल्यासह स्थानिक बससेवेवर प्रवाशांचा अतिरिक्त ताण वाढला होता.

दुसरा शनिवार, रविवारी शासकीय सुटी तर सोमवारी ईद-ए-मिलादनिमित्त सुटी  आहे. त्यामुळे बहुतांशी नोकरदार आणि कर्मचाऱ्यांची ये-जा वाढली आहे. त्यामुळे बसथांब्यांवरही प्रवाशांची वर्दळ पहावयास मिळाली. विशेषत: मध्यवर्ती बसस्थानकात प्रवाशांची गर्दी उसळली होती.

विशेषत: कोल्हापूर, निपाणी, चिकोडी, पुणे, मुंबई, बेंगळूर, हुबळी, धारवाड, बेळ्ळारी, गोवा आदी मार्गांवर प्रवाशांची संख्या वाढली होती. गणेशोत्सव काळातच सलग तीन दिवस मिळाल्यामुळे प्रवाशांची ये-जा सुरू होती. सुटीच्या काळात बाहेर गावी जाणाऱ्या प्रवाशांची संख्या अधिक असते. त्यामुळे शनिवारी मध्यवर्ती बसस्थानकात हजारो प्रवाशांनी गर्दी केली होती.