गँगवाडीत बेकायदा दारू जप्त ; माळमारुती पोलिसांची कारवाई

बेळगाव : माळमारुती पोलिसांनी गँगवाडी येथील एका जुन्या घरातील सुमारे 1 लाख 10 हजार रुपये किमतीची बेकायदा दारू जप्त केली आहे. यासंबंधी तिघा जणांवर एफआयआर दाखल करण्यात आले आहे. माळमारुतीचे पोलीस उपनिरीक्षक पी. एम. मोहिते, सी. आय. चिगरी, प्रकाश कोनेण्णावर, गोपाल लट्टी, शिवानंद गुडेर आदींनी शनिवारी 6 सप्टेंबर रोजी रात्री 11 वाजण्याच्या सुमारास ही कारवाई केली आहे. यासंबंधी बाळू दत्ता सकट, ओमकार बाळू सकट, रुक्षार ओमकार सकट तिघे राहणार गँगवाडी यांच्यावर कर्नाटक अबकारी कायदा कलम 32 व 34 अन्वये एफआयआर दाखल करण्यात आला आहे. वेगवेगळ्या कंपनीची व्हिस्की, रम, बियर पोलिसांनी जप्त केली आहे. छाप्यानंतर तिन्ही संशयित फरारी झाल्याचे पोलिसांनी सांगितले.