आइसलँडमध्ये खचली बर्फाची गुहा, एकाचा मृत्यू

वृत्तसंस्था/ बर्लिन

दक्षिण आइसलँडच्या ब्रीडामेरकुरजोकुल ग्लेशियरच्या ठिकाणी पोहोचलेल्या पर्यटकांच्या एका समुहावर बर्फाची गुहा कोसळल्याने एकाचा मृत्यू झाला आहे. तर दुर्घटनेत दोन जण बेपत्ता झाले आहेत. रविवारी दुपारी तीन वाजता पोलिसांना दुर्घटनेची माहिती मिळाली होती. अनेक देशांशी संबंधित 25 पर्यटकांचा एक समूह बर्फाच्या गुहांचा शोध घेत असताना ही दुर्घटना घडली असल्याचे पोलिसांकडून सांगण्यात आले.

या दुर्घटनेत दोन जण गंभीर जखमी झाले होते. यातील एकाचा दुर्घटनास्थळीच मृत्यू झाला आहे. तर अन्य जखमीला हेलिकॉप्टरद्वारे राजधानी रेक्जानिक येथील रुग्णालयात हलविण्यात आले आहे.  तर बचाव पथक दोन बेपत्ता पर्यटकाचा शोध घेत आहे. धोकादायक परिस्थितीत ही शोधमोहीम काही काळासाठी रोखण्यात आली होती. परंतु सोमवारी ही शोधमोहीम पुन्हा सुरू करण्यात आली आहे. दुर्घटनेवेळी बहुतांश लोक गुहेबाहेर असल्याने मोठी जीवितहानी टळल्याचे स्थानिक लोकांकडून सांगण्यात आले.