‘आय वाँट टू टॉक’चा ट्रेलर जारी

अभिषेक बच्चन मुख्य भूमिकेत

अभिषेक बच्चनचा आगामी चित्रपट ‘आय वाँट टू टॉक’चा ट्रेलर प्रदर्शित करण्यात आला आहे. हा चित्रपट प्रेक्षकांच्या मनाला स्पर्श करणारा आहे. काही चित्रपट असे असतात, ज्यात अॅक्शन, स्टंट काहीच नसते, तरीही चित्रपटाची सशक्त असते. अभिषेकचा हा चित्रपट काहीसा असाच असल्याचे मानले जात आहे.

शूजीत सरकार यांच्या या चित्रपटातील प्रत्येक दृश्य मनाला भिडणारे असल्याची प्रतिक्रिया ट्रेलर पाहून उमटत आहे. या चित्रपटात अभिषेकने उत्तम अभिनय केला आहे. चित्रपटाचा हा ट्रेलर असाधारण जाणीव करून देत असून प्रेक्षकांची उत्सुकता यामुळे वाढली आहे.

अभिषेक या ट्रेलरमध्ये वेगवेगळ्या लुकमध्ये दिसून येत आहे. यात त्याने अर्जुन ही भूमिका साकारली आहे. त्याच्यासमोर अनेक आव्हाने दिसून येत आहेत. शूजीत सरकारने स्वत:च्या खास शैलीत जीवनातील वाईट आणि चांगल्या पैलूंदरम्यान संतुलन दाखविले आहे. अर्जुन एकीकडे स्वत:च्या आजाराशी लढत आहे, तर दुसरीकडे त्याच्या आयुष्यात त्याची मुलगी असून त्याला एकटाच सांभाळताना दिसून येतो.

जॉनी लिव्हर, जयंत कृपलानी आणि अहिल्या बामरू यासारख्या उत्तम कलाकारांसोबत ट्रेलरमध्ये दिसून येणारा क्षण प्रेक्षकांना उत्साहित करतो. हा चित्रपट 22 नोव्हेंबर रोजी प्रदर्शित होणार असून याची निर्मिती रायजिंग सन फिल्म्स अणि किनो वर्क्सकडून करण्यात आली आहे.