मराठीसाठी आवाज उठविणाऱ्या नगरसेवकांचा सत्कार
शिवसेनेतर्फे आयोजन, कन्नड सक्तीविरोधात उद्धव ठाकरे यांची घेणार भेट
बेळगाव : कर्नाटक सरकारकडून कन्नड सक्तीचा बडगा दिवसेंदिवस तीव्र केला जात आहे. महानगरपालिकेतील कन्नड सक्तीबाबत म. ए. समितीच्या नगरसेवकांनी जोरदार आवाज उठविला. सध्या सुरू असलेल्या कन्नड सक्तीबाबत शिवसेना पक्षप्रमुख उद्धव ठाकरे यांची लवकरच भेट घेतली जाणार असल्याची माहिती जिल्हा प्रमुख प्रकाश शिरोळकर यांनी दिले. मराठी भाषेसाठी मनपात आवाज उठविणाऱ्या मराठी नगरसेवकांचा सत्कार सोमवारी शिवसेना मध्यवर्ती कार्यालयात झाला. नगरसेवक रवी साळुंखे, शिवाजी मंडोळकर, वैशाली भातकांडे यांचा सत्कार करण्यात आला. माजी महापौर सरिता पाटील, प्रकाश शिरोळकर, युवा नेते शुभम शेळके यांच्या हस्ते सत्कार करण्यात आला. यावेळी शिवसेनेचे तालुका प्रमुख सचिन गोरले, शहर प्रमुख दिलीप बैलूरकर, रामनगर येथील शिवसैनिक शाम पनीकर, राजकुमार बोकडे, दत्ता पाटील, महेश टंकसाळी, विजय सावंत, राजू कणेरी, धनंजय पाटील यासह कार्यकर्ते मोठ्या संख्येने उपस्थित होते.