आरोग्य विभाग अलर्ट...

कोल्हापूर :

जिल्हा पूरप्रवण म्हणून ओळखला जातो. पावसाचे प्रमाण अधिक असल्याने जिह्यात पूर परिस्थिती निर्माण होते. यंदाच्या पावसाळ्यात जिह्यात संभाव्य पूरपरिस्थिती उद्भवल्यास आरोग्य विभागाने पूर परिस्थितीत आरोग्य सेवा पुरवण्याचे आणि पूर ओसरल्यानंतर घ्यावयाच्या खबरदारीचे सुक्ष्म नियोजन केले आहे. पूर परिस्थितीत आवश्यक उपाययोजना जिल्हा परिषदेच्या आरोग्य विभागामार्फत करण्यात आल्या असून आरोग्य विभाग आतापासूनच दक्ष झाला आहे.

आरोग्य विभागाने पावसाळ्यात संभाव्य पूर परिस्थितीबरोबरच साथरोग नियंत्रणासाठी काटेकोर नियोजन केले आहे. 5 सामान्य, उपजिल्हा रुग्णालये, 18 ग्रामीण रुग्णालये, 76 प्राथमिक आरोग्य केंद्रे, 416 उपकेंद्रांमार्फत 1 हजार 225 गावातील लोकांना आरोग्य सुविधा पुरवल्या जाणार आहेत. तात्काळ आरोग्य सेवा पुरवण्यासाठी 36 रग्णवाहिका (108 क्रमांक) आणि 76 रुग्णवाहिका (102- क्रमांक) (यामध्ये विंगर-35, फोर्स-10, फोर्स ट्रक्स-1, बलेरो-1 आणि टाटा सुमो-29 चा समावेश) आरोग्य विभागाच्या दिमतीला सज्ज आहेत.

• पुरेसा औषध साठा उपलब्ध

साथरोग प्रतिबंधासाठी आणि संभाव्य पूर परिस्थितीमध्ये छावण्यांसाठी पुरेसा औषधसाठा उपलब्ध केला आहे. पूरामुळे बाधित होणाऱ्या गावांमध्ये निवारा (छावणी) केंद्रांमध्ये आरोग्य पथकाची स्थापना केली आहे. छावण्यांव्यतिरीक्त 267 पूरबाधित गावांमध्ये ट्रान्झिट आरोग्य पथकाची स्थापना केली आहे. तालुका पंचायत समिती हातकणंगले, शिरोळ, उपकेंद्र घोसरवाड, प्राथमिक आरोग्य केंद्र, कवठेगुलंद व सर्व तालुका आरोग्य अधिकारी कार्यालयामध्ये औषधांचा साठा (बफर स्टॉक) करण्यात येत आहे. पूरबाधित होणाऱ्या गावांत रुग्णवाहिकेची सुविधा, पिण्याचे पाणी शुद्धीकरणासाठी मेडीक्लोर, क्लोरीन गोळ्यांचे वाटप करण्यात येणार आहे. प्रतिबंधात्मक आणि उपचारात्मक गोळ्यांचेही वाटप करण्याचे नियोजन केले आहे. पिण्याचे पाणी शुद्धीकरणासाठी 76 आरोग्य केंद्रे व 416 उपकेंद्रांमध्ये 492 क्लोरोस्कोप आणि 22 हजार 800 लिटर मेडीक्लोर उपलब्ध करण्यात येत आहे. सर्पदंशासह इतर सर्व अत्यावश्यक औषधे पुरेशा प्रमाणात संस्था स्तरावर उपलब्ध करुन ठेवली आहेत.

पिण्याच्या पाण्याचे टँकरचे शुद्धीकरण, निवारा (छावणी) मध्ये स्थलांतरीत होणाऱ्या सर्व महिला, किशोरवयीन मुलींना सॅनिटरी पॅडचे वाटप करण्याचे नियोजित आहे. संभाव्य पूर परिस्थितीत जिह्यातील सुमारे 391 पूरबाधित होणाऱ्या गावांतील 44 हजार 706 कुटुंबातील 1 लाख 94 हजार 464 लोकसंख्येला आरोग्य सेवा पुरवण्यासाठी कोटेकोर नियोजन केले आहे.

• 24 तास नियंत्रण कक्ष कार्यरत

जिल्हास्तरीय, तालुकास्तरीय, प्राथमिक आरोग्य केंद्र स्तरावर 24 तास साथरोग नियंत्रण कक्ष कार्यरत राहणार आहे. वैद्यकीय अधिकारी आणि आरोग्य कर्मचाऱ्यांचे प्रशिक्षण घेण्यात आले आहे. संभाव्य पूरबाधित गावात आरोग्य सेवा पुरवण्यासाठी खासगी डॉक्टर, परिचारिकांचा सहभाग घेण्यात येणार आहे. पुरेशा प्रमाणात औषधसाठा आणि किटची उपलब्धता ठेवण्यात आली आहे.

जिल्हा हितवाप अधिकारी कार्यालयात 20 फॉगिंग मशीन, नगर परिषदांकडे 23, महापालिका-15, प्राथमिक आरोग्य केंद्र व उपकेंद्राच्या ठिकाणी 99 आणि ग्रामपंचायतीमध्ये 127 असे 284 फॉगिंग मशीन उपलब्ध आहेत.

• गर्भवतींची विशेष काळजी

जिह्यात मे महिन्यात 1100, जून महिन्यात 1394, जुलै महिन्यात 1108 आणि ऑगस्ट महिन्यात 1137 अशा 4739 संभाव्य प्रसूती होणाऱ्या गर्भवती आहेत. त्यांच्या प्रसुती तारखेपूर्वी आठ दिवस अगोदर नजीकच्या प्राथमिक आरोग्य केंद्रात त्यांना दाखल केले जाणार आहे. गर्भवतीसह एका नातेवाईकांची राहण्याची, जेवणाची सोय आरोग्य संस्थेच्या ठिकाणी केली जाणार आहे.

• जिल्हा परिषद प्रशासन दक्ष

पूर परिस्थिती उद्भवल्यास पूर ओसरल्यानंतर साथरोग प्रतिबंध व रोगराई न पसरू नये म्हणून उपाययोजना करण्यात आल्या आहेत. पूरग्रस्त भागात ताप, जुलाब, कोरोनाच्या अनुषंगाने आरोग्य कर्मचाऱ्यांमार्फत दैनंदिन सर्व्हेक्षण, न पिण्याच्या पाण्याच्या स्त्राsतांचे दैनंदिन शुद्धीकरण, परिसर, वैयक्तिक व सार्वजनिक स्वच्छता, कीटकजन्य आजार नियंत्रण, पूर ओसल्यानंतर धुरळणी (डस्टिंग), मॅलेथियॉन 5 टक्के पावडर फॉगिंग मशिन लोकसंख्येच्या प्रमाणात उपलब्ध करुन ठेवली आहे. एकंदरीत संभाव्य पूर परिस्थितीमध्ये आणि पावसाळ्यात साथरोग नियंत्रणासाठी जिल्हा परिषद प्रशासनाने परिपूर्ण नियोजन केले असून जनतेच्या आरोग्याची काळजी घेण्यासाठी आरोग्य विभाग दक्ष आहे.