भारताच्या विजयामध्ये हरमनप्रितची हॅट्ट्रीक

वृत्तसंस्था/ अँटवर्प (बेल्जियम)

आंतरराष्ट्रीय हॉकी फेडरेशनच्या हॉकी प्रो-लिग स्पर्धेतील येथे झालेल्या सामन्यात कर्णधार हरमनप्रित सिंगच्या शानदार हॅट्ट्रीकच्या जोरावर भारतीय पुरुष हॉकी संघाने अर्जेंटिनाचा 5-4 अशा गोल फरकाने पराभव केला.

या सामन्यामध्ये भारतातर्फे कर्णधार हरमनप्रित सिंगने 29 व्या, 50 व्या आणि 52 व्या मिनिटाला असे 3 गोल केले. अर्जितसिंग हुंडालने 7 व्या मिनिटाला आणि गुरुजंत सिंग 18 व्या मिनिटाला गोल नोंदविले. अर्जेटिनातर्फे फेड्रिको मोंजाने तिसऱ्या मिनिटाला, निकोलास किनेनने 24 व्या मिनिटाला, मेरुसीने 54 व्या मिनिटाला आणि लुकास मार्टिनेसने 57 व्या मिनिटाला गोल नोंदविले. या सामन्यात मध्यंतरापर्यंत भारताने अर्जेंटिनावर 3-2 अशी आघाडी मिळविली होती. आता या स्पर्धेत भारताचा पुढील सामना जर्मनीबरोबर 1 जूनला होणार आहे. या सामन्यामध्ये भारताने पेनल्टी कॉर्नरवर गोल करण्याच्या अनेक संधी वाया घालविल्याने त्यांना हा सामना मोठ्या गोलफरकाने जिंकता आला नाही. कर्णधार हरमनप्रित सिंगने एक गोल पेनल्टी स्ट्रोकवर नोंदविला. सामन्यातील तिसऱ्या 15 मिनिटांच्या कालावधीत दोन्ही संघांच्या बचावफळीचा कामगिरी भक्कम झाल्याने गोल होऊ शकला नाही.