टी-20 अष्टपैलूंमध्ये हार्दिक पंड्या पुन्हा अग्रस्थानी

वृत्तसंस्था/ दुबई

भारताचा स्टार खेळाडू हार्दिक पंड्याने टी-20 अष्टपैलूंच्या क्रमवारीत पुन्हा एकदा अग्रस्थान पटकावले आहे तर तिलक वर्माने मोठी झेप घेत फलंदाजांच्या  क्रमवारीत तिसरे स्थान मिळविले आहे. आयसीसीने बुधवारी ताजी क्रमवारी जाहीर केली.

हार्दिकने अष्टपैलूंच्या क्रमवारीत इंग्लंडचा लियाम लिव्हिंगस्टोन व नेपाळचा दीपेंद्र सिंग आयरी यांना मागे टाकत अग्रस्थान पटकावले आहे. दक्षिण आफ्रिकेविरुद्ध अलीकडेच झालेल्या टी-20 मालिकेतील शानदार कामगिरीचा त्याला क्रमवारीत बढती मिळण्यास लाभ झाला आहे. भारताने ही मालिका 3-1 अशा फरकाने जिंकली. हार्दिकने दुसऱ्यांदा या क्रमवारीत अग्रस्थान मिळविले आहे.

दक्षिण आफ्रिकेविरुद्ध मालिकावीराचा पुरस्कार मिळविणारा तिलक वर्मा यानेही एकदम 69 स्थानांची मोठी झेप घेतली असून तो आता तिसऱ्या स्थानावर पोहोचला आहे. दोन शतकांसह 280 धावा जमविल्याचा त्याला फायदा झाला आहे. फलंदाजांमध्ये ट्रॅव्हिस हेड व इंग्लंडचा फिल सॉल्ट पहिल्या व दुसऱ्या क्रमांकावर आहेत.