गुरप्रीत सिंगला रौप्यपदक

वर्ल्ड चॅम्पियनशिप नेमबाजीत भारताला 13 पदकांसह तिसरे स्थान, चीन पहिल्या स्थानावर

वृत्तसंस्था/ कैरो, इजिप्त

भारताच्या गुरप्रीत सिंगने येथे सुरू असलेल्या वर्ल्ड नेमबाजी चॅम्पियनशिपमध्ये पुरुषांच्या 25 मी. सेंटर फायर पिस्तुल प्रकारात सुवर्ण मिळविण्याच्या अगदी समीप आला होता. पण इनर 10 च्या संख्येत कमी पडल्याने त्याला अखेर रौप्यपदकावर समाधान मानावे लागले. युक्रेनच्या पावलो कोरोस्टीलोव्हने सुवर्णपदक पटकावले.

वर्ल्ड चॅम्पियनशिपमधील गुरप्रीतचे हे दुसरे वैयक्तिक पदक आहे. यापूर्वी 2018 मध्ये चांगवॉन येथे झालेल्या स्पर्धेत 25 मी. स्टँडर्ड पिस्तुल प्रकारातही रौप्य मिळविले होते. फ्रान्सच्या यान पियरे लुईसने येथे कांस्यपदक मिळविले. भारताने एकूण 13 पदकांसह या स्पर्धेची मोहिम संपवली. त्यात 3 सुवर्ण, 6 रौप्य, 4 कांस्यपदकांचा समावेश आहे. चीनने पहिले स्थान मिळविताना 12 सुवर्ण, 7 रौप्य व 2 कांस्यपदके मिळविली तर दक्षिण कोरियाने 7 सुवर्ण, 3 रौप्य व 4 कांस्यपदकांसह दुसरे स्थान मिळविले.

गुरप्रीतने प्रिसिजन व रॅपिड फायर टप्प्यात एकूण 584-18 एक्स गुण मिळविले तर कोरोस्टीलोव्हने 29 वेळा इनर 10 आणि रॅपिडच्या अंतिम फेरीत पूर्ण 100 गुण मिळवित सुवर्ण पटकावले. प्रिसिजन टप्प्यात गुरप्रीतने 95, 97, 96 असे गुण घेत नववे स्थान मिळविले तर दुसऱ्या दिवशी झालेल्या रॅपिड टप्प्यात 98, 99, 99 गुण घेत रौप्य निश्चित केले. भारताच्या अन्य तीन नेमबाजांची कामगिरी सांघिक पदक मिळवण्यास पुरेशी ठरली नाही.

या स्पर्धेत सम्राट राणाने 10 मी. एअर पिस्तुलमध्ये, रवींद्र सिंगने 50 मी. स्टँडर्ड पिस्तुल व 10 मी. एअर पिस्तुल सांघिकमध्ये सुवर्णपदके मिळविली. ऐश्वर्य प्रताप सिंग तोमर, अनीश भनवालाने 25 मी. रॅपिड फायर पिस्तुलमध्ये, गुरप्रीत सिंगने 25 मी. सेंटर फायर पिस्तुलमध्ये, ईशा सिंग व सम्राट राणा यांनी 10 मी. एअर पिस्तुल मिश्र सांघिकमध्ये, 10 मी. महिलांच्या एअर पिस्तुल सांघिक व 50 मी. पुरुषांच्या स्टँडर्ड पिस्तुल सांघिकमध्ये रौप्यपदके मिळविली. ईशा सिंगने 25 मी. स्पोर्ट्स पिस्तुल, इलावेनिल वलरिवनने 10 मी. एअर रायफल, वरुण तोमरने 10 मी. एअर पिस्तुल व 10 मी. महिलांच्या एअर रायफल सांघिकमध्ये कांस्यपदके मिळविली.