डॉक्टरला हनीट्रॅपमध्ये अडकवणारी टोळी जेरबंद
शिरवळ :
खंडाळा तालुक्यातील शिरवळ पोलीस स्टेशन हद्दीमध्ये एका प्रतिष्ठित खाजगी डॉक्टरांना हनीट्रॅपच्या जाळ्यात अडकवित व्हिडीओ पाठवून तब्बल 1 कोटी रुपयांची खंडणी डॉक्टर व कुटुंबियांना मागणाऱ्या टोळीच्या मुसक्या शिरवळ पोलिसांनी सापळा रचत आवळल्या आहे. यामध्ये पैसे घेण्याकरिता आलेल्या 2 युवकांना शिरवळ पोलिसांनी जेरबंद केले असून मुख्य सूत्रधार सध्या फरार असून शिरवळ पोलीसांकडून शोध सुरू आहे.
याबाबतची शिरवळ पोलिसांनी दिलेली अधिक माहिती अशी कि, शिरवळ पोलीस स्टेशन हद्दीमध्ये एक प्रतिष्ठित खाजगी डॉक्टर यांचा तीन गावांमध्ये दवाखाना आहे. दरम्यान, संबंधित खाजगी डॉक्टर यांच्याकडे कामाकरिता असलेल्या एका महिलेची नातेवाईक असलेली एक साधारण 19 वर्षीय युवती वैद्यकीय सेवेकरिता असताना अचानकपणे बेपत्ता झाली. याबाबतची बेपत्ता असल्याची तक्रार शिरवळ पोलीस स्टेशनला दाखल झाल्यानंतर काही दिवसांनी खाजगी डॉक्टर यांच्या मोबाईलवर संबंधित युवतीबरोबरचा एक व्हिडिओ येत डॉक्टरांना संबंधितांकडून 1 कोटींची मागणी करण्यात आली. यावेळी संबंधित खाजगी डॉक्टरांना आपल्यावर हनीट्रॅपचा प्रकार झाला असल्याचे निदर्शनास येताच संबंधित घटना डॉक्टरांनी आपल्या डॉक्टर पत्नींना देत फलटण पोलीस उपविभागीय अधिकारी राहुल धस यांच्याकडे याबाबतची घटना सांगताच राहुल धस यांनी याबाबतची कल्पना सातारा पोलीस अधिक्षक समीर शेख, अपर पोलीस अधिक्षक डॉ. वैशाली कडुकर यांना देत शिरवळ पोलीस स्टेशनचे वरिष्ठ पोलीस निरीक्षक यशवंत नलावडे यांच्या नेतृत्वाखाली सहाय्यक पोलीस निरीक्षक किर्ती म्हस्के, परिविक्षाधीन पोलीस उपनिरीक्षक सपना दांगट, पोलीस अंमलदार अजित बोऱ्हाटे, अविनाश बाऱ्हाळे, सुरज चव्हाण, प्रशांत धुमाळ, दिपक पालेपवाड, निलिमा भिलारे, स्नेहल शिंगटे यांच्या पथकाने शिरवळ येथील रामेश्वर गार्डन याठिकाणी सापळा रचत खंडणीपोटी दुचाकी (क्रं- एमएच-12-व्ही एस-5998) वरून आलेल्या नितीन नवनाथ प्रधान (वय 20), दत्ता आप्पाराव घुगे (वय24,दोघे रा. शिंदेवाडी ता.खंडाळा) यांना संबंधित डॉक्टर व त्यांच्या पत्नीकडून 1 कोटी रकमेपैकी 1.50 लाख रुपये स्वीकारताना रंगेहाथ पकडले.
यावेळी पैसे स्वीकारण्यासाठी आलेल्या संबंधितांना शुभम जलान (पूर्ण नाव माहित नाही) हा मुख्य सूत्रधार याबाबत दूरध्वनीद्वारे मार्गदर्शन करीत असल्याचे शिरवळ पोलिसांच्या निदर्शनास आले. यावेळी या घटनेनंतर खंडाळा तालुक्यात खळबळ उडाली असून शिरवळ पोलिसांनी पैसे घेण्यासाठी आलेल्या दोघांना अटक केली आहे. याबाबतची शिरवळ पोलीस स्टेशनला डॉक्टरांनी फिर्याद दिली असून सहाय्यक पोलीस निरीक्षक किर्ती म्हस्के ह्या अधिक तपास करीत आहे.