जी. साथीयान टेटे स्पर्धेत विजेता

वृत्तसंस्था/ लेबनॉन

बैरुत येथे झालेल्या विश्व टेबल टेनिस फेडरेशनच्या फीडर सिरीज टेटे स्पर्धेत भारताचा पुरुष टेटेपटू जी. साथीयानने एकेरीचे अजिंक्यपद पटकावले. विदेशातील टेबल टेनिस स्पर्धेत पुरुष एकेरीचे जेतेपद मिळवणारा साथीयान हा पहिला भारतीय टेबल टेनिसपटू आहे.

या स्पर्धेच्या शेवटच्या पुरुष एकेरीच्या अंतिम सामन्यात जी. साथीयानने आपल्या देशाच्या मानव ठक्करचा 3-1 अशा गेम्समध्ये (6-11, 11-7, 11-7, 11-4) असा पराभव केला. या स्पर्धेमध्ये साथीयानने भारताच्या पाचव्या मानांकित हरमित देसाईचा 15-13, 6-11, 11-8, 13-11 तर त्यानंतरच्या सामन्यात टॉप सिडेड चुयाँग युआनचा 11-8, 11-13, 11-8, 11-9 असा पराभव करत अंतिम फेरीपर्यंत मजल मारली होती.

या स्पर्धेमध्ये महिलांच्या विभागात झिया लियान नी हिने एकेरीचे जेतेपद मिळवताना सू वॉनचा 11-9, 11-5, 11-5 अशा गेम्समध्ये पराभव केला. या स्पर्धेत भारताच्या मानव ठक्कर आणि मनुष शहा यांना पुरुष दुहेरीमध्ये उपविजेतेपदावर समाधान मानावे लागले. अँडी परेरा आणि जॉर्ज कांपोस यांनी मानव ठक्कर आणि शहा यांचा 5-11, 11-7, 13-11, 14-12 असा पराभव केला. दिव्या चितळे आणि मनुष शहा यांनी मिश्र दुहेरीचे अजिंक्यपद पटकावताना अंतिम सामन्यात मानव ठक्कर व अर्चना कामत यांचा 3-1 (11-6, 10-12, 11-6, 11-6) असा पराभव केला.