मधमाशांच्या हल्ल्यात चार जखमी

वृद्धेची प्रकृती गंभीर असल्याने आयसीयूमध्ये दाखल

कारवार : मधमाशांच्या हल्ल्याच्या दोन वेगवेगळ्या घटनांमध्ये चार जण जखमी झाले आहेत. यापैकी एक वृद्धा गंभीररित्या जखमी झाली असून उपचारासाठी वृद्धेला आयसीयूमध्ये दाखल केले आहे. मधमाशा हल्ल्यांच्या घटना भटकळ तालुक्यातील जालीकोडी आणि शिराली बंगारमक्ती फाट्याजवळ घडल्या आहेत. जालीकोडी येथील एकाच कुटुंबातील मास्तम्मा मुंजप्पा नाईक (वय 70), जानकी नाईक (वय 37) आणि सुरेश नाईक (वय 45) यांच्यावर घरात घुसून हल्ला केल्याने हे सर्वजण जखमी झाले आहेत. तातडीने या सर्वांना उपचारासाठी भटकळ येथील सरकारी रुग्णालयात दाखल करण्यात आले आहे. जखमीपैंकी मास्तम्मा ही वृद्धा गंभीररीत्या जखमी झाली असून तिला उपचारासाठी आयसीयूमध्ये दाखल करण्यात आले आहे. दरम्यान भटकळ तालुक्यातील मल्लारी येथील गणपती मंजय्या नाईक (वय 44) या मार्केटला जात असताना शिराली बंगारमक्की फाट्याजवळ मधमाशांनी त्यांच्यावर हल्ला चढविला. मधमाशांच्या हल्यात नाईक जखमी झाले असून त्यांना उपचारासाठी भटकळ येथील सरकारी रुग्णालयात दाखल करण्यात आले. काही दिवसापूर्वी गोकर्ण येथे काही पर्यटकावर मधमाशांनी हल्ला चढविला होता.