माजी क्रिकेटपटू वेंकटेश प्रसाद यांच्याकडून मुख्यमंत्री-उपमुख्यमंत्र्यांची सदिच्छा भेट

बेळगाव : कर्नाटक राज्य क्रिकेट असोसिएशनचे नूतन अध्यक्ष वेंकटेश प्रसाद व सचिव संतोष मेनन यांनी बुधवारी बेळगाव येथे मुख्यमंत्री सिद्धरामय्या व उपमुख्यमंत्री डी. के. शिवकुमार यांची सदिच्छा भेट घेतली. गेल्याच आठवड्यात कर्नाटक राज्य क्रिकेट असोसिएशनसाठी झालेल्या निवडणुकीत अध्यक्षपदी भारतीय संघातील माजी क्रिकेटपटू वेंकटेश प्रसाद यांची निवड झाली आहे. येथील सरकारी विश्रामधाम येथे क्रिकेट असोसिएशनच्या पदाधिकाऱ्यांनी दोन्ही नेत्यांची भेट घेतली. यावेळी उपाध्यक्ष सुजित सोमसुंदर, माजी खजिनदार विनय मृत्युंजय आदी उपस्थित होते. मुख्यमंत्री सिद्धरामय्या व उपमुख्यमंत्री डी. के. शिवकुमार यांचे पुष्पगुच्छ देऊन असोसिएशनच्यावतीने स्वागत करण्यात आले.