सिलिंडर स्फोटामुळे पाच जणांचा मृत्यू

लखनौमधील दुर्घटना : 4 गंभीर : मृतांमध्ये पती-पत्नीसह 3 मुले

वृत्तसंस्था/ लखनौ

उत्तर प्रदेशात लखनौमधील काकोरी येथील हाता हजरत साहेब परिसरातील एका दुमजली इमारतीत मंगळवारी रात्री आग लागली. आग लागताच दोन सिलिंडरचा स्फोट झाला. या अपघातात दाम्पत्यासह पाच जणांचा मृत्यू झाला. यामध्ये तीन मुलांचाही समावेश आहे. घटनेची माहिती मिळताच पोलीस व अग्निशमन दलाच्या जवानांनी दीड तासात आग आटोक्मयात आणली. या भीषण अपघातात अन्य चार जण भाजले असून त्यांना ट्रॉमा सेंटरमध्ये दाखल करण्यात आले आहे. चौघांचीही प्रकृती चिंताजनक आहे.

मुशीर अली (50, रा. हाता हजरत साहेब) हे फटाक्मयाचा व्यवसाय करत होते. मंगळवारी रात्री 10.30 च्या सुमारास त्यांच्या घराच्या दुसऱ्या मजल्यावर आग लागल्यानंतर काही मिनिटांतच दोन सिलिंडरचाही मोठा स्फोट झाला. या स्फोटांमुळे घराचे छत उडाले आणि भिंतीही कोसळल्या. घरातील लोक बाहेर येईपर्यंत आग घरभर पसरली. मुशीर यांच्या खोलीत शॉर्टसर्किटमुळे आग लागल्याचे पोलिसांच्या प्राथमिक तपासात समोर आले आहे. मुशीर व इतर आग विझवण्याचा प्रयत्न करत असताना दोन्ही सिलिंडरचा स्फोट झाला. त्यानंतर आग नियंत्रणाबाहेर गेली आणि संपूर्ण घराला आग लागली. मुशीर, त्यांची पत्नी हुस्ना बानो (45) यांच्यास रैया (5), हिबा (2) आणि हुमा (3) या आगीत जिवंत जळाल्या. पोलीस आणि अग्निशमन दलाने बचावकार्य राबवत चौघांना वाचवले असले तरी त्यांची प्रकृती गंभीर असल्याचे सांगण्यात आले. अपघाताच्या वेळी घरात 20 हून अधिक लोक होते. सुदैवाने अन्य लोक वेळेत बाहेर पडल्यामुळे ते बचावले.