अखेर तीन दिवसांच्या घसरणीला विराम

सेन्सेक्समध्ये 446 अंकांची उसळी : आशियाई बाजारात घसरण

वृत्तसंस्था / मुंबई

भारतीय भांडवली बाजारात चालू आठवड्यातील दुसऱ्या सत्रात मंगळवारी मागील तीन दिवसांची घसरण थांबली आहे. यावेळी सेन्सेक्स 446 अंकांनी वधारुन बंद झाला. तिमाही निकालांपूर्वी रिलायन्स इंडस्ट्रीज आणि एचडीएफसी बँक सारख्या दिग्गज कंपन्यांमध्ये खरेदी आणि लार्सन अँड टुब्रोच्या शेअर्समध्ये वाढ झाली.

मुख्य कंपन्यांच्या मदतीने बीएसई सेन्सेक्स 270 अंकांनी घसरून 80,620.25 वर उघडला. ट्रेडिंग दरम्यान निर्देशांकात चढ-उतार दिसून आले. तो दिवसअखेर सेन्सेक्स 446.93 अंकांनी वाढून 81,337.95 वर बंद झाला. तसेच, राष्ट्रीय शेअर बाजारचा निफ्टी 140.20 अंकांच्या वाढीसह 24,821.10 वर बंद झाला. सेन्सेक्सच्या 30 कंपन्यांपैकी 20 कंपन्यांचे शेअर्स घसरणीसह बंद झाले. रिलायन्स इंडस्ट्रीज, लार्सन अँड टुब्रो, एशियन पेंट्स, टाटा मोटर्स आणि अदानी पोर्ट्स हे समभाग तेजीत होते. व्यापक बाजारपेठांमध्येही वाढ दिसून आली. धातू, फार्मा, रिअल्टी, तेल आणि वायू आणि आरोग्यसेवा समभागांमध्ये लक्षणीय वाढ नोंदवली गेली.

ट्रम्प टॅरिफबद्दल गुंतवणूकदार चिंतेत

गेल्या तीन व्यापार सत्रांमध्ये बेंचमार्क निफ्टी आणि सेन्सेक्स दोन्ही 2 टक्क्यांहून अधिक घसरले आहेत. तात्पुरत्या आकडेवारीनुसार, सोमवारी विदेशी पोर्टफोलिओ गुंतवणूकदारांनी 608.1 कोटी रुपयांचे भारतीय शेअर्स विकले. 30 मे नंतर भारतात त्यांची ही सर्वात मोठी विक्री आहे. अध्यक्ष डोनाल्ड ट्रम्प यांच्या 1 ऑगस्टच्या अंतिम मुदतीपूर्वी अमेरिकेसोबत व्यापार करार लांबणीवर टाकल्याने होणाऱ्या परिणामांबद्दल गुंतवणूकदार चिंतेत आहेत. रॉयटर्सने गेल्या आठवड्यात दोन भारतीय सरकारी सूत्रांचा हवाला देत म्हटले होते की, शेती आणि दुग्धजन्य पदार्थांवरील कर कपातीबाबत भारत आणि अमेरिका यांच्यातील चर्चा थांबली आहे.