गणेशोत्सव काळात धावणार जादा बस

गणेश दर्शनासाठी परिवहनचा निर्णय

प्रतिनिधी/ बेळगाव

गणेशभक्तांची गैरसोय टाळण्यासाठी गणेशोत्सव काळात शहरांतर्गत विविध मार्गांवर जादा बस सोडण्याचा निर्णय परिवहनने घेतला आहे. दि. 10 ते 16 सप्टेंबर दरम्यान जादा बस धावणार आहेत. अनगोळ, वडगाव, मजगाव, कंग्राळी, सह्याद्रीनगर, येळ्ळूर आदी मार्गांवर ही बससेवा सुरू राहणार आहे.

मुंबई, पुणे पाठोपाठ बेळगावतही मोठ्या जल्लोषात गणेशोत्सव साजरा केला जातो. शिवाय सार्वजनिक गणेशोत्सव मंडळांतर्फे देखावे सादर केले जातात.  आकर्षक मूर्तींची स्थापना केली जाते. दरम्यान गणेशाचे दर्शन घेण्यासाठी भक्तांची गर्दी असते. यासाठी गणेशोत्सवकाळात शहरांतर्गत बससेवेत वाढ केली जाणार आहे.

खानापूर, गोकाक, चंदगड, चिकोडी, बैलहोंगल, कोल्हापूर, गोवा आदी ठिकाणाहून गणेशभक्त बेळगावात दाखल होतात. विशेषत: विविध ठिकाणी असलेल्या गणेशाचे दर्शन घेतात. या भक्तांची गैरसोय होऊ नये यासाठी शहरांतर्गत बसफेऱ्या वाढविल्या जाणार आहेत.