प्लास्टिक कचऱ्यामुळे उडाली साऱ्यांचीच तारांबळ
शिवाजी रोडवरील लेंडी नाल्यात कचरा अडकल्याने समस्या : रात्री उशिरापर्यंत मनपाचे कर्मचारी नालासफाई कामावर
बेळगाव : प्लास्टिक बॉटल, पिशव्या तसेच इतर साहित्य वापरून ते गटारीत फेकून दिले जाते. मात्र, जोरदार पावसामुळे हेच प्लास्टिकचे साहित्य साऱ्यांचीच डोकेदुखी ठरत आहे. बुधवारी जोरदार पावसामुळे शहरातील सांडपाणी व गटारींचे पाणी वाहून नेणारा लेंडीनाला, अंबा भुवनजवळील पुलाजवळ ब्लॉक झाल्याने एकच गोंधळ उडाला. यासाठी महानगरपालिकेला मोठी कसरत करावी लागली. तब्बल दोन तास यासाठी नगरसेवकांसह अधिकाऱ्यांना धावपळ करावी लागली.
नाल्यात मोठ्या प्रमाणात कचरा असल्याची माहिती नगरसेविका वैशाली भातकांडे, जयतीर्थ सवदत्ती, सिद्धार्थ भातकांडे यांना समजली. त्यांनी याची माहिती महानगरपालिकेला दिली. महानगरपलिकेचे कर्मचारी दाखल झाले. मात्र जेसीबी नसल्याने समस्या निर्माण झाली. मनपाच्या मुख्य अभियंत्या लक्ष्मी निपाणीकर यादेखील दाखल झाल्या.यानंतर त्यांनी तातडीने जेसीबी मागवून कचरा काढण्याचा प्रयत्न केला. रात्री उशिरापर्यंत हे काम सुरू होते.