तैवान ओपनमध्ये भालाफेक प्रकारात डीपी मनूला सुवर्ण
वृत्तसंस्था/ तैपई सिटी
भारताचा स्टार भालाफेकपटू डीपी मनूने शनिवारी तैवान ओपनमध्ये 81.58 मीटर थ्रो करत सुवर्णपदकाला गवसणी घातली. आशियाई अॅथलेटिक्स चॅम्पियनशिपच्या रौप्य विजेत्या मनूने आपल्या पाचव्या प्रयत्नात सर्वोत्तम थ्रो नोंदवला. विशेष म्हणजे, मनूची सर्वोत्तम कामगिरी 84.35 मी इतकी आहे. पॅरिस ऑलिम्पिक कोटा 85.50 मीटरला असून आतापर्यंत नीरज चोप्रा व किशोर जेना यांनी पात्रता मिळवली आहे. स्पर्धेसाठी एका महिन्याचा कालावधी असून मनूला ऑलिम्पिक कोटा मिळवण्याची संधी असणार आहे. शनिवारी झालेल्या स्पर्धेच्या अंतिम फेरीत 24 वर्षीय मनूने पहिल्या प्रयत्नात 78.32 मी भाला फेकला. यानंतर दुसऱ्या प्रयत्नात त्याने 76.80 मी, तिसऱ्या प्रयत्नात 80.59 मी भालाफेक केली. चौथ्या प्रयत्नात त्याने फाऊल केला पण अखेरच्या प्रयत्नात 81.58 मीटर थ्रो करत सुवर्णमय कामगिरी मनूने नोंदवली. दरम्यान, तैवानच्या चेंग चाओने 76.21 मीटरसह रौप्यपदक तर हुआंग चाओने कांस्यपदक पटकावले.