जोकोव्हिचची स्पर्धेतून माघार

वृत्तसंस्था/ बेलग्रेड (सर्बिया)

इटलीतील ट्युरिन येथे येत्या रविवारपासून खेळविल्या जाणाऱ्या 2024 च्या टेनिस हंगामातील पुरुषांच्या एटीपी फायनल्स टेनिस स्पर्धेतून विद्यमान विजेता सर्बियाचा टेनिसपटू नोव्हॅक जोकोव्हिचने माघार घेतली आहे. दुखापतीच्या समस्येमुळे त्याने या स्पर्धेत सहभागी होणार नसल्याचे स्पर्धा आयोजकांना कळविले आहे.

गेल्या वर्षी झालेल्या या स्पर्धेत जोकोव्हिचने इटलीच्या टॉप सिडेड जेनिक सिनेरचा पराभव करत अजिंक्यपद मिळविले होते. जोकोव्हिचने एटीपी टूरवरील ही स्पर्धा विक्रमी सात वेळा जिंकली आहे. या स्पर्धेत प्रत्येक वर्षी एटीपी मानांकनातील पहिल्या 8 टेनिसपटूंचा सहभाग राहतो. 2024 च्या टेनिस हंगामात जोकोव्हिचने 37 सामने जिंकले असून 9 सामने गमविले आहेत. त्याने पॅरिस ऑलिम्पिक स्पर्धेत सुवर्णपदक मिळविले आहे. एटीपी टूरवरील जोकोव्हिचचे हे 99 वे विजेतेपद आहे.