बसवेश्वर चौकामधील नामफलकाची दुरवस्था

रंगरंगोटी करण्याकडे महापालिकेचे दुर्लक्ष

बेळगाव : बसवेश्वर चौक (गोवावेस) परिसराच्या सुशोभिकरणाकडे महानगरपालिकेने पाठ फिरविली आहे. चौकाचे नाव दर्शविणारी फलकांवरील अक्षरे पुसली जाऊन अनेक महिने उलटले तरी त्याकडे मनपाने दुर्लक्षच केले आहे. एकीकडे महात्मा बसवेश्वरांना राज्य सरकारने राज्याच्या सांस्कृतिक प्रतिकाचा दर्जा दिला आहे. दुसरीकडे त्यांच्या नावे असलेल्या चौकाच्या सुशोभिकरणासाठी स्मार्ट सिटी किंवा मनपाने कोणतीच पावले उचललेली नाहीत. त्यामुळे बसव भक्तांमध्ये नाराजीचा सूर दिसून येत आहे. या चौकाचे सुशोभिकरण करण्याकडे दुर्लक्ष झाले असून, पुसट फलक बदलण्याचे कामही मनपाने केले नाही. त्यामुळे नाराजी व्यक्त करण्यात येत असून, त्वरित नवा फलक बसवून चौकाची शोभा वाढवण्याची मागणी केली जात आहे.