घुसखोर दहशतवाद्यांचा ड्रोनच्या माध्यमातून शोध

वृत्तसंस्था/श्रीनगर

जम्मू-काश्मीरच्या पूंछ जिह्यातील गुरसाई टॉप भागात बुधवारी रात्री उशिरा दहशतवाद्यांनी घुसखोरीचा प्रयत्न केला. घुसखोरीच्या वृत्तानंतर लष्कर आणि पोलिसांच्या संयुक्त पथकाने संयुक्तपणे शोधमोहीम हाती घेतली. यादरम्यान जंगल परिसरात सुरक्षा दल आणि दहशतवाद्यांमध्ये गोळीबार झाला. घुसखोरीला अटकाव करण्यासाठी लष्कराने गोळीबार केल्यानंतर दहशतवादी पुन्हा जंगलभागात पसार झाले. त्यानंतर सुरक्षा दलाने ड्रोन आणि स्निफर डॉगच्या मदतीने शोधमोहीम राबविली. गुरुवारी दिवसभर सदर भागात शोध घेतल्यानंतरही घुसखोरांचा मागमूस लागू शकला नाही. लष्कराच्या गोळीबारामुळे दहशतवादी माघारी परतल्याची माहिती सूत्रांकडून देण्यात आली.