जयपूरच्या विजयात देसवालची चमक

वृत्तसंस्था / नोएडा

2024 च्या प्रो कबड्डी  लीग स्पर्धेतील येथे झालेल्या 75 व्या सामन्यात अर्जुन देसवालच्या दर्जेदार कामगिरीच्या जोरावर जयपूर पिंक पँथर्सने विद्यमान विजेत्या पुणेरी पल्टनचा 37-23 अशा 14 गुणांच्या फरकाने पराभव केला.

या सामन्यात जयपूर पिंक पँथर्स संघातील प्रमुख चढाईपटू अर्जुन देसवालने 16 गुण नोंदविले. सामन्याला सुरुवात झाल्यानंतर पहिल्या 10 मिनिटांच्या कालावधीत दोन्ही संघांतील अनुभवी खेळाडूंच्या समावेशामुळे आक्रमक चढाया फोल ठरल्या. पुणेरी पल्टनतर्फे आकाश शिंदे तर जयपुर संघातर्फे निरज नरवाल यांच्याकडे चढायांची सुत्रे होती. अर्जुन देस्वालच्या चढायाने पुणेरी पल्टनचे पहिल्यांदाच सर्वगडी बाद झाल्याने जयपूर पिंक पँथर्सने बऱ्यापैकी आघाडी मिळविली होती. जयपूर संघाच्या कर्णधाराने आपल्या चढाईवर मोहीत आणि सत्त्याप्पा मट्टी या पुणेरी पल्टनच्या दोन खेळाडूंना बाद केले. सामन्याच्या मध्यंतरावेळी जयपूर पिंक पँथर्सने पुणेरी पल्टनवर 19-11 अशी आघाडी घेतली होती. उत्तराधार्थातील खेळाला प्रारंभ झाल्यानंतर अर्जुन देस्वालच्या शानदार कामगिरीने पुणेरी पल्टनचे दुसऱ्यांदा सर्वगडी बाद झाले. देसवालने सुपर-10 गुण नोंदविले. पुणेरी पल्टन संघाला शेवटच्या 15 मिनिटांमध्ये बचावात्मक पवित्रा घ्यावा लागल्याने जयपूर पिंक पँथर्सने हा सामना 14 गुणांच्या फरकाने जिंकला.