हलगा-बस्तवाड रोडवरील वीजखांब सरळ करण्याची मागणी

वार्ताहर/सांबरा

हलगा-बस्तवाड रोडवरील विद्युत तारेचे खांब वाकल्याने मोठा धोका निर्माण झाला आहे. हेस्कॉमने याची दखल घेऊन सदर विद्युत खांब सरळ करावेत, अशी मागणी होत आहे. हलगा गावातील बसवाण गल्ली येथून बस्तवाडकडे जाणाऱ्या रस्त्यावर असलेले विद्युतखांब वाकलेल्या स्थितीत आहेत. या रस्त्यावरून टेम्पोसह इतर मोठी वाहने नेहमीच ये-जा करतात. त्यामुळे वाहन चालकांना येथून जाणे धोक्याचे बनले आहे. वाकलेल्या खांबामुळे भीतीचे वातावरण निर्माण झाले आहे. धोकादायक खांबाजवळ रस्त्यावर दगड ठेवून नागरिकांना सतर्कतेचा इशारा देण्यात आला आहे. याबाबत नागरिकांनी हेस्कॉमला कळवून देखील खांब सरळ करण्याकडे दुर्लक्ष करण्यात येत आहे. याची दखल घेऊन विद्युत खांब सरळ करावेत, अशी मागणी जोर धरू लागली आहे.