बेळगाव-सांबरा मार्गावरील बाजूपट्ट्यांची त्वरित दुरुस्त करण्याची मागणी

सांबरा : बेळगाव-सांबरा मार्गावरील बाजूपट्ट्या ठिकठिकाणी खचल्याने अपघाताचा धोका वाढला आहे. तरी संबंधित खात्याने तातडीने बाजूपट्ट्यावर भराव टाकावा अशी मागणी जोर धरू लागली आहे . बेळगाव-सांबरा रस्त्यावर दररोज वाहनांची जास्त वर्दळ असते. त्यामुळे या रस्त्याची देखभाल करणे गरजेचे आहे. सध्या मुतगे येथे या रस्त्याची दुर्दशा झाली आहे. मुख्य रस्त्यावर लहान-मोठे खड्डे पडले आहेत. गावच्या बसथांब्यानजीकच्या रस्त्याच्या बाजूपट्ट्या मोठ्या प्रमाणावर खचल्या आहेत. नजीकच शाळा असल्याने येथून विद्यार्थ्यांचे येणे-जाणे असते. या रस्त्यावरून जाणाऱ्या नवीन वाहनचालकांना खचलेल्या बाजूपट्ट्यांचा अंदाज येत नसल्याने अपघात होण्याचा जास्त संभव आहे. यासाठी संबंधित अधिकाऱ्यांनी तातडीने बाजूपट्ट्यांची दुऊस्ती करावी अशी मागणी वाहनचालकांतून होत आहे.