चिनी जहाजांकडून हेरगिरीचा धोका

चीन-पाकिस्तान नौदलाच्या सरावावर भारताची कडक नजर

वृत्तसंस्था/ नवी  दिल्ली

चीन आणि पाकिस्तानचे नौदल सध्या संयुक्त सराव करत आहेत. भारतीय नौदलही या सरावावर लक्ष ठेवून आहे. नौदल विशेषत: चिनी जहाजांवर विशेष लक्ष देत असल्याची माहिती सरकारी सूत्रांनी बुधवारी दिली. मलाक्का सामुद्रधुनीतून चिनी जहाजे हिंद महासागरात घुसल्यापासून ते भारताच्या रडारवर असल्याचे सूत्रांचे म्हणणे आहे.

पाकिस्तान आणि चीनच्या नौदल तुकड्या आजपर्यंतचा सर्वात मोठा युद्धसराव करत आहेत. या सरावाला ‘सी गार्डियन-3’ असे नाव देण्यात आले आहे. या सरावादरम्यान दोन्ही देशांचे नौदल थेट अग्निशमन कवायती करत आहेत. सागरी शक्ती दाखवणे हा त्यांचा उद्देश आहे. चीनचे नौदल हिंदी महासागरात आपली ताकद वाढवण्याचा प्रयत्न करत आहे. त्यानिमित्ताने कोणता ना कोणता बहाणा करून चिनी नौदल हिंदी महासागरात हेरगिरी करण्याचा प्रयत्न करत आहे. गेल्या वषीही हिंदी महासागरात चिनी निगराणी आणि सागरी सर्वेक्षण जहाजांची उपस्थिती आढळून आली होती. अलीकडेच, संशोधनाच्या नावाखाली श्रीलंकेतील कोलंबोमध्ये पाळत ठेवणारे चिनी जहाज तैनात करण्यात आले होते.

ताकद वाढविण्याचा प्रयत्न

चीन आणि पाकिस्तानच्या नौदलांनी अरबी समुद्रात कराची किनारपट्टीवर युद्धाभ्यास सुरू केला आहे. याचदरम्यान, चिनी पाणबुड्या हिंदी महासागरात मार्गक्रमण करणार आहेत. साहजिकच चिनी नौदल या युक्तीद्वारे हिंदी महासागराच्या विशाल भागाचे सर्वेक्षण करू शकते, अशी भीती भारताकडून व्यक्त होत आहे. चीन हिंदी महासागरात पाण्याखाली जाण्यासाठी नकाशे तयार करण्यासाठी डेटा गोळा करत असल्याने त्याकडे भारतीय नौदलाचे लक्ष आहे. चीनचा धोका लक्षात घेऊन भारतीय नौदलानेही त्यांच्यावर कटाक्ष ठेवला आहे.