दबंग दिल्लीची बंगाल वॉरियर्सवर मात

वृत्तसंस्था / हैद्राबाद

2024 च्या प्रो कबड्डी लीग स्पर्धेतील येथे झालेल्या चुरशीच्या सामन्यात दबंग दिल्लीने बंगाल वॉरियर्सचा 33-30 अशा तीन गुणांच्या फरकाने विजय मिळविला. या स्पर्धेतील दबंग दिल्लीचा हा तिसरा विजय आहे.

या सामन्यात दबंग दिल्ली संघातील आशू मलिकची कामगिरी दर्जेदार झाली. या स्पर्धेत आशू मलिकने आतापर्यंत 8 सामन्यात 7 वेळा सुपर 10 गुण घेतले आहेत. या सामन्यातही त्याने सुपर 10 गुण मिळविले असून त्याला विनय आणि आशिष यांची चांगली साथ मिळाली. बंगाल वॉरियर्सच्या नितीन धनकरने 15 गुण मिळविले. या सामन्याला बंगाल वॉरियर्सने दमदार सुरुवात करुन दिली. या संघातील मणी आणि फजल अत्राचली यांनी शानदार खेळ करत आपल्या संघाला झटपट गुण मिळवून दिले. मात्र दबंग दिल्ली संघातील आशू मलिकने आपल्या वैयिक्तक कामगिरीच्या जोरावर सामन्याचे चित्र पालटले. दबंग दिल्लीची बचावफळी शेवटपर्यंत भक्कम राहिल्याने बंगाल वॉरियर्सच्या चढाया निष्फळ ठरल्या. आशिषच्या खेळामुळे दबंग दिल्लीने बंगाल वॉरियर्सवर दोन गुणांची आघाडी मिळविली होती. सामन्यातील पहिल्या सत्राअखेर दबंग दिल्लीने बंगाल वॉरियर्सचे सर्वगडी बाद करुन 6 गुणांची आघाडी मिळविली होती. मध्यंतरावेळी दबंग दिल्लीने बंगाल वॉरियर्सवर 19-13 अशी आघाडी घेतली होती.

त्यानंतर सामन्याच्या उत्तरार्धातील पहिल्या पाच मिनिटातच बंगाल वॉरियर्स संघातील नितीन धनकरने सुपर-10 गुण मिळविल्याने दबंग दिल्लीवर पुन्हा दडपण येवू लागले. या सामन्यातील अंतिम टप्प्यात नितीन धनकरने 15 गुणापर्यंत मजल मारत दबंग दिल्लीची आघाडी खूपच कमी केली. यावेळी दोन्ही संघात केवळ 4 गुणांचा फरक होता. या विजयामुळे दबंग दिल्लीने गेल्या चार सामन्यातील आपली पराभवाची मालिका खंडीत केली.