कॉर्निंग भारतात बनवणार गोरीला ग्लासची निर्मिती

चेन्नई : अनेक स्मार्टफोन्स हे गोरीला ग्लाससह बाजारात उपलब्ध असलेले आपण पाहिलेले आहेत. कॉर्निंग ही कंपनी गोरीला ग्लासची निर्मिती करते, जी भारतात उत्पादन कारखाना सुरु करण्याचा विचार करते आहे. तामिळनाडूत कांचीपुरम येथे अॅपलची पुरवठादार कंपनी कारखाना सुरु करणार असून यासाठी 1003 कोटी रुपयांची गुंतवणूक केली जाणार आहे. याअंतर्गत कंपनी आगामी काळात 840 जणांना रोजगाराची संधी उपलब्ध करुन देणार आहे. कंपनी हे काम ऑप्टीमस इंफ्राकॉम, भारत इनोव्हेटीव्ह ग्लास टेक्नॉलॉजीस प्रायव्हेट लिमिटेड यांच्या संयुक्त विद्यमाने करणार असल्याची माहिती कंपनीने दिली आहे. यासंदर्भात कंपनीने तामिळनाडू सरकारसोबत सहकार्याचा करार केला आहे. मागच्या वर्षी डिसेंबरमध्ये याबाबतीत कंपनीने स्पष्टीकरण दिले होते.