बार असोसिएशनचे अध्यक्ष अॅड.किवडसण्णावर यांच्या विरोधात अविश्वास
प्रतिनिधी/ बेळगाव
बेळगाव बार असोसिएशन अध्यक्षांच्या बाजूने 194 तर विरोधात 428 जणांनी मतदान केले. त्यामुळे अध्यक्ष अॅड. एस. एस. किवडसण्णावर यांच्या विरोधात अविश्वास मतदान झाले असल्याने अध्यक्षपदासाठी फेब्रुवारी महिन्यात निवडणूक घेतली जाणार आहे. शनिवार दि. 20 रोजी बार असोसिएशनच्या सभागृहात ही निवडणूक प्रक्रिया अॅड. के. बी. नाईक, अॅड. विनय मांगलेकर यांच्या निरीक्षणाखाली पार पडली.
बेळगाव बार असोसिएशनचे विद्यमान अध्यक्ष अॅड. एस. एस. किवडसण्णावर यांच्या विरोधात 455 वकिलांनी सह्या करून अविश्वास ठराव आणण्याची मागणी उच्च न्यायालयाकडे केली होती. त्यानुसार उच्च न्यायालयाने तातडीने बेळगाव बार असोसिएशनला बैठक घेऊन चर्चा करण्याची सूचना केली होती. त्यानुसार बेळगाव बार असोसिएशनच्यावतीने शनिवार दि. 20 रोजी विशेष सर्वसाधारण सभेचे आयोजन करण्यात आले होते. दुपारी बार असोसिएशनच्या सभागृहात बार असोसिएशनचे उपाध्यक्ष अॅड. एम. बी. मुगळी, अॅड. विनय मांगलेकर, अॅड. के. बी. नाईक, बार असोसिएशनचे जनरल सेक्रेटरी अॅड. यल्लाप्पा दिवटे आदींच्या उपस्थितीत बैठकीला सुरुवात झाली. बैठकीला बार असोसिएशनचे सभासद मोठ्या संख्येने उपस्थित होते. यावेळी अविश्वास ठरावासंदर्भात मतदान घेण्याची जोरदार मागणी करण्यात आली. त्यामुळे दुपारी 3.30 वाजता बॅलेट पेपरच्या माध्यमातून मतदान प्रक्रियेला सुरुवात झाली. अत्यंत चुरशीने मतदान प्रक्रिया सायंकाळी 6.30 पर्यंत सुरू होती. त्यानंतर निवडणूक निरीक्षकांच्या उपस्थितीत मतपेटी सील करण्यात आली. निरीक्षकांच्या हस्ते मतपेटी उघडून मतमोजणीला सुरुवात झाली. सुरुवातीपासूनच बार असोसिएशनच्या विद्यमान अध्यक्षांविरोधात मतदान होण्याचे प्रमाण अधिक होते. रात्री पावणे आठच्या दरम्यान मतमोजणी पूर्ण झाली. एकूण 629 जणांनी मतदानाचा हक्क बजावला. केवळ 194 जणांनी विद्यमान अध्यक्षांच्या बाजूने तर 428 जणांनी विरोधात मतदान केले. तर 7 मते अवैध ठरली. अविश्वास प्रक्रिया पार पडल्यानंतर विद्यमान अध्यक्षांविरोधात अधिक मतदान झाल्याने त्यांच्या विरोधीगटातर्फे न्यायालय आवारात फटाक्यांची आतषबाजी करून आनंदोत्सव साजरा करण्यात आला. अध्यक्षपदासाठी फेब्रुवारी महिन्यात निवडणूक घेतली जाणार असून तोपर्यंत उपाध्यक्ष किंवा वरिष्ठ पदाधिकाऱ्यांकडे अध्यक्षपदाची सूत्रे सोपविली जाणार असल्याचे समजते. मतदानाच्या पार्श्वभूमीवर न्यायालय आवारात पोलीस बंदोबस्तात वाढ करण्यात आली होती.