मुख्यमंत्री आज सादर करणार अर्थसंकल्प

पणजी : मुख्यमंत्री डॉ. प्रमोद सावंत हे अर्थमंत्री या नात्याने आज राज्य विधानसभेत 2025-26 या आर्थिक वर्षासाठीचा अर्थसंकल्प सादर करणार आहेत. 2019 मध्ये मुख्यमंत्रीपद स्वीकारल्यानंतर त्यांचा हा सातवा अर्थसंकल्प आहे. आज ते सादर करीत असलेला अर्थसंकल्प नेमका कशा स्वरूपाचा आहे, याबाबत जनतेची उत्सुकता ताणलेली आहे. मुख्यमंत्र्यांनी यापूर्वीच पर्यटन आणि रोजगार चालना देण्याच्या कल्पना प्रत्यक्षात साकार करायच्या आहेत, असे सूतोवाच केले असल्यामुळे रोजगाराभिमुख आणि पर्यटनासाठी थोडे जास्त प्रयत्न अशा पद्धतीचा यंदाचा अर्थसंकल्प राहील, असे समजते. आज दुपारी अडीच वाजता मुख्यमंत्री अर्थसंकल्प सादर करतील. तत्पूर्वी ते मंत्रिमंडळाची बैठक घेतील आणि त्यात मंत्र्यांना याबाबत काही कल्पना देतील.