दिवाडी कोटी तीर्थ प्रकल्पाच्या प्रगतीचा मुख्यमंत्र्यांकडून आढावा

पणजी : दिवाडी येथील प्रस्तावित ‘कोटी तीर्थ कॉरिडॉर’ प्रकल्पाच्या प्रगतीचा मुख्यमंत्री प्रमोद सावंत यांनी आढावा घेऊन संबंधित अधिकाऱ्यांना मार्गदर्शन केले. कोटी तीर्थ कॉरिडॉर प्रकल्पाच्या प्रगतीचा आढावा घेणे तसेच पायाभूत सुविधा कामांची प्रभावी सुऊवात करण्यासाठी शुक्रवारी खास बैठकीचे आयोजन करण्यात आले होते. त्यावेळी मुख्यमंत्र्यांनी समिती सदस्य आणि वरिष्ठ अधिकाऱ्यांना मार्गदर्शन केले. कोटी तीर्थ कॉरिडॉर हा एक वारसा-केंद्रित उपक्रम आहे. पोर्तुगीज वसाहतवादी राजवटीत नष्ट झालेल्या मंदिरांचे स्मारक करणे हा त्याचा उद्देश आहे. राज्याच्या प्रगल्भ वारसा संस्कृतीचे जतन, रक्षण, संवर्धन करतानाच हा कॉरिडॉर सांस्कृतिक आणि आध्यात्मिक केंद्र म्हणून काम करील, अशी अपेक्षा बाळगण्यात आली आहे.