चेपॉकचे मैदान धोनीमय, गावसकरही झाले धोनीचे फॅन!
वृत्तसंस्था/ चेन्नई
महान फलंदाज सुनील गावसकर आणि महेंद्रसिंग धोनी हे क्रिकेटमधील दोन महान खेळाडू. पण या दोघांनी चेन्नईचा सामना संपल्यावर सर्वांची मने जिंकल्याचे पाहायला मिळाले. चेन्नईचा हा घरच्या मैदानातील अखेरचा सामना होता. पण या सामन्यात त्यांना केकेआरकडून पराभव पत्करावा लागला. सामना संपल्यावर चेन्नईचा कर्णधार धोनी मैदानातील चाहत्यांना काही भेटवस्तू देत होता. यावेळी चाहते धोनीची एक झलक जवळून पाहण्यासाठी उत्सुक होते. याचवेळी सुनील गावसकर हे धोनीच्या जवळ गेले आणि त्यांनी जी गोष्ट केली त्यामुळे क्रिकेट चाहते अजूनच खूश झाले. यामध्ये दिग्गज फलंदाज सुनील गावसकर यांनी धोनीचा ऑटोग्राफ घेतला, तोही चक्क आपल्या शर्टवर. दरम्यान, गावसकर भेटायला आल्याचे कळताच धोनीही थोडा थांबला. त्याने चाहत्यांना भेटवस्तू देणे थोडा वेळ थांबवले. यानंतर धोनी आणि गावसकर यांच्यामध्ये काही काळ बोलणे झाले. त्यानंतर धोनीने थेट आपला हात त्यांच्या शर्टच्या जवळ नेला. धोनीने गावसकर यांना त्यांच्या शर्टवर आपली सही दिली आणि त्या दोघांमध्ये एकच स्मितहास्य पाहायला मिळाले. सही मिळाल्यावर गावस्कर यांनी धोनीला मिठी मारली आणि त्यानंतर त्याला शुभेच्छाही दिल्या.
दरम्यान, सुनील गावसकर यांनी धोनीची ऑटोग्राफ घेतलेला व्हिडीओ सोशल मीडियावर प्रचंड व्हायरल झाला असून चाहत्यांनी त्याला मोठ्या प्रमाणात लाईक्स केले आहे. गावसकरांनी आपल्या शर्टवर धोनीची ऑटोग्राफ घेतली. दोघांनी एकमेंकाची गळाभेटही घेतला. या खास क्षण सोशल मीडियावर व्हायरल झाला आहे.
रिंकूला दिली ऑटोग्राफ
कोलकात्याने सामन्यात बाजी मारली. यामध्ये रिंकूचा मोठा वाटा होता. या विजयानंतर रिंकू सिंह याला धोनीचा ऑटोग्राफ मिळाली. सामन्यानंतर रिंकूने धोनीकडून ऑटोग्राफ घेतली. याचाही व्हिडीओ सोशल मीडियावर व्हायरल झाला आहे.
चेपॉकवर प्रेक्षकांची गर्दी
यंदाच्या हंगामातील चेन्नईच्या चेपॉकवरील अखेरच्या सामन्याला प्रेक्षकांनी मोठ्या प्रमाणात गर्दी केली होती. सामना संपल्यानंतर धोनीसह संघातील इतर खेळाडूंनी मैदानाला गोल चक्कर मारत प्रेक्षकांचे आभार मानले. धोनीने प्रेक्षकांकडे चेंडू टाकल्यानंतर हा क्षण आणखी खास झाला. सर्व खेळाडूंनी चेपॉक मैदानावर आलेल्या प्रेक्षकांचे मन जिंकले. याचा व्हिडीओ सोशल मीडियावर व्हायरल होत आहे. चेपॉकवरच्या मैदानावर धोनीने प्रेक्षक आणि संघासोबत सेल्फीही घेतला.