‘ओएनडीसी’ व्यवहारांवर आकारणार शुल्क

वृत्तसंस्था /नवी दिल्ली

सरकारने विकसित केलेले ओपन नेटवर्क फॉर डिजिटल कॉमर्स (ओएनडीसी) चालू आर्थिक वर्ष 2024-25 मध्ये वापरकर्ता शुल्क आकारण्यास सुरुवात करू शकते. मात्र, किती शुल्क आकारले जाणार याबाबत अद्याप कोणताही निर्णय झालेला नाही. मिळालेल्या माहितीनुसार, हे शुल्क कमी असेल आणि प्रत्येक व्यवहारावर आकारले जाण्याची शक्यता आहे. शुल्क एकतर विक्रेता किंवा खरेदीदार किंवा दोघांनी भरावे लागणार आहे.

ओएनडीसीचे व्यवस्थापकीय संचालक आणि सीईओ टी. कोशी यांनी एका मुलाखतीत सांगितले की, आम्ही नेटवर्कच्या वाढीचे मूल्यांकन करू आणि योग्य वेळ ठरवू. आम्ही अद्याप त्याची रचना करण्याचा मार्ग ठरवलेला नाही. लहान, स्थानिक विक्रेते जे डिजिटल प्लॅटफॉर्मवर कधीच नव्हते त्यांचाही समावेश करणे हे त्याचे उद्दिष्ट आहे. ती फक्त नेटवर्क प्रदाता आहे.

आम्ही डिजिटल इन्फ्रास्ट्रक्चर प्रोव्हायडरची भूमिका बजावत आहोत. आम्हाला कोणतीही केंद्रीय यंत्रणा किंवा व्यासपीठ सांभाळण्याची गरज नाही. मागणी निर्मिती हा खरेदीदार अॅप, विक्रेता अॅप, विक्रेते आणि ओएनडीसी यांचा संयुक्त प्रयत्न आहे. यामुळे आमचा खर्च खूपच कमी राहतो असेही कोशी म्हणाले आहेत. युनिफाइड पेमेंट्स इंटरफेस प्रमाणे, ओएनडीसी देखील एक उपयुक्तता आहे. पण युपीआयप्रमाणे प्रत्येक सुविधेची किंमत असते आणि ती किंमत कोणाला तरी सहन करावी लागते.