कॅनडाचा इराणला झटका,रिव्होल्युशनरी गार्ड कोरवर बंदी

ओटावा : कॅनडातील जस्टिन ट्रुडो सरकारने इराणच्या सशस्त्र दलांची शाखा इस्लामिक रिव्होल्युशनरी गार्ड कोरला (आयआरजीसी) दहशतवादी संघटना म्हणून घोषित केले आहे. कॅनडाचे सार्वजनिक सुरक्षा मंत्री डोमिनिक लेब्लांक यांनी आयआरजीसीच्या दहशतवादी कारवाया रोखण्यासाठी स्वत:कडे उपलब्ध असलेल्या सर्व साधनांचा वापर कॅनडा करणार असल्याची घोषणा केली आहे. आयआरजीसीच्या वरिष्ठ सदस्यांसोबत इराणच्या हजारो अधिकाऱ्यांना आता कॅनडात प्रवेश करता येणार नाही. तर कॅनडात यापूर्वीच राहत असलेल्या इराणी अधिकाऱ्यांची चौकशी केली जाऊ शकते तसेच त्यांची देशातून हकालपट्टी केली जाऊ शकते अशी माहिती ब्लांक यांनी दिली आहे. या घोषणेच्या परिणामादाखल कॅनडातील वित्तीय संस्था म्हणजेच बँका आणि ब्रोकरेजला दहशतवादी संघटनेची संपत्ती त्वरित गोठवावी लागणार आहे.