नक्षलविरोधी शूर पोलीस अधिकारी नामदे यांना शौर्यपदक

पाटकुल /सुहास परदेशी :

सोलापूर जिल्ह्यातील पाटकुलसारख्या छोट्याशा गावातून पोलीस शिपाई पदावरून कारकिर्दीला सुरुवात करून थेट राष्ट्रपती पोलीस शौर्यपदक मिळवणाऱ्या सहाय्यक पोलीस निरीक्षक नामदे यांचा जीवनप्रवास धैर्य, समर्पण आणि देशभक्तीचा मूर्त आदर्श ठरतो.

गडचिरोलीच्या नक्षलग्रस्त जंगलात कार्यरत असताना, त्यांनी जीव धोक्यात घालून ‘कमांडो 60’ या विशेष पथकाचे नेतृत्व करत अनेक धाडसी कारवाया यशस्वीपणे पार पाडल्या. या असामान्य शौर्याची दखल घेत २९ जुलै २०२५ रोजी मुंबईतील राजभवनात राज्यपालांच्या हस्ते त्यांना राष्ट्रपती पोलीस शौर्यपदक प्रदान करण्यात आले.

• पाटकुलच्या मातीतून रणभूमीपर्यंतचा प्रवास

पाटकुल (ता. मोहोळ) येथे प्राथमिक शिक्षण घेतल्यानंतर, पंढरपूरच्या कर्मवीर भाऊराव पाटील महाविद्यालयातून त्यांनी उच्च शिक्षण पूर्ण केले. २००६ मध्ये पोलीस शिपाई म्हणून सेवेला सुरुवात केल्यानंतर, २०१३ मध्ये स्पर्धा परीक्षा उत्तीर्ण करून पोलीस उपनिरीक्षकपदी निवड झाली.

• गडचिरोलीतील शौर्यगाथा – ‘कमांडो 60’ चे नेतृत्व

पोलीस प्रशिक्षणानंतर त्यांची नियुक्ती गडचिरोलीच्या अतिदुर्गम नक्षलग्रस्त भागात झाली. तेथे त्यांनी नक्षलविरोधी ‘कमांडो 60’ पथकाचेनेतृत्व करताना किसनेली, मुरूम बोसी, आणि खोबरामेंढा येथे घडलेल्या चकमकींत विशेष शौर्य गाजवले.

नक्षलवाद्यांविरुद्ध झालेल्या अनेक एन्काऊंटर, शस्त्रसाठा जप्ती, स्फोटक नाश, तसेच शरणागती मोहिमेत त्यांचा मोलाचा वाटा राहिला. आज ते पुणे शहरातील पर्वती पोलीस ठाण्यात सहाय्यक पोलीस निरीक्षक म्हणून कार्यरत असून, त्यांच्या डोळ्यांत देशसेवेचा तोच तेजस्वी झपाटलेपणा आजही स्पष्टपणे दिसतो.

• शौर्याचा सन्मान – विविध पुरस्कारांनी गौरव

"सध्या मी पुणे शहरातील पर्वती पोलीस ठाण्यात सहाय्यक पोलीस निरीक्षक पदावर कार्यरत आहे. माझं एकच स्वप्न आहे – ‘देशासाठी काहीतरी मोठं करून दाखवायचं!’"

नामदे यांचा प्रवास केवळ एका अधिकाऱ्याचा नाही, तर तो एका योद्ध्याचा आहे – जो संकटांना सामोरे गेला, देशासाठी लढला आणि अखेर त्याच्या धैर्याला राष्ट्राने सलाम केला.